January ni 28 atanga February ni 2, 2018 chhung khan Council of Scientific and Industrial Research (CSIR) hnuaia Institute of Bioresource Technology (IHBT), Palampur, Himachal Pradesh atanga lokal Scientist rualte chuan Champhai leh a chheh vela Apple enchhinna hmun an rawn tlawh a. Apple chingtute huanah kalin Training leh a taka entirna Scientist-te’n an nei a. He Training hi Horticulture mithiamte leh DRDA Official-te’n an tawiawm a ni. Huan neitute chu thlai chin kawnga tihdan phung hrang hrang leh Apple hrisel leh tha thar theih dante zirtir an ni.

Champhai ram leilung leh sik leh sa milin Champhai District hmun hrang hrangah boruak vawt ngam chi Apple (Anna, Dorset, Gan galla, Red galla.Scarlet galla) chin a ni a. Hei hi Mizoramah boruak vawt ngam chi Apple chin chhinna hmasa ber a ni. Heng Apple chi hi Israel leh Britain a siam chhuah, CSIR-IHBT-a mithiamten an thuam that a ni a. Nikum hmasa khan Champhai leh Hnahlan-a Loneitu chhungkaw pariat te hnenah bultan nan kung 25 theuh phun tir an ni a. Apple dangin rahchhuah tura degree 7 hnuai lamah darkar 1200-1500 chhung hun an mamawh laiin, tuna phun Apple-te hi chuan rah turin khawvawtah hian darkar 300 chiah a mamawh bakah phun tan hun atanga kum thum chhunga  rah tura beisei a ni.

Heng Apple chi te hi tlangram feet 4000 chunglam a  sang,  khawvawhna hmun a tha thei tura ngaih niin,  Apple  kung chi 4,  thingkung dang nena sawhzawm (Column) - Ana,  Dorset,  Fuji leh Gala te hi awmze nei a phun tlar a ni a,  feet 3 lai a thuk laih khuara leitha chi hrang hrang chawhpawlh hmanga hnawh khah anih hnuah meter 4 zet a inhlatin phuntir an ni a.  Apple chi 4 zinga Dorset leh Gala-te hi Apple rahchhuahna pe tura chi chhuahtu (polinizer)  niin  a kar thelh a phun vek a ni.  

Dr. Rakesh Kumar, Principal Scientist leh Pi Zosangzuali Pachuau, Project Director, DRDA Champhai-te chuan Apple chin kawnga hmalaknaah hian beiseina an neih san hle thu an sawi a. Kum 2016 leh 2017 chhung khan enchhinna atan Apple kung 400 lai Champhai District chhunga hmun hrang hrangah chin a ni a. Apple than duan dan leh a nun that duh dan milin boruak vawt ngam chi Apple kung 800 huan neitute hnenah phun tura sem leh a ni. Dr. Rakesh Kumar-a chuan amah kawmtute hnena a hrilh dan in boruak vawt ngam chi Apple-te hi Champhai District in a mamawh ber niin, khaw lum leh vawh lamah thlasik laia 7° C emaw, a aia vawt emaw hi  boruak chungchanga duhthusam niin a sawi. Jammu & Kashmir (Himachal Pradesh) leh Uttarakhand State hmuna Apple an chin thinte aiin khaw vawt ngam chi Apple-te’n an hmun mamawh hi a vawt zawk a ni.

Scientist zinga mi Dr. Giresh Nadda, Entomologist chuan huan neitute hnenah Oraganic hmanga rannung laka Apple ven dan zirtirna a pe a. Organic Farming hmanga Apple tha leh hralh tla zawk an thar theih nan Organic Farming kalpui a tul zia hrilhin huan neitute chu uar takin a fuih bawk a. Pi Zosangzuali Pachuau, Project Director, DRDA Champhai pawhin Apple chin enchhinna atan Champhai District hmun hrang hrangah ram 5.5 Acre-a zauah chhungkaw 32 thlanchhuahte’n an kalpui mek thu a sawi bawk. Dr. Sanjay Kumar chuan Apple chin hi Champhai District-ah a phurawm thu sawiin, huan neitute tan an dam khawchhuahna leh eibar kawnga an dinhmun chawikanna hnar pawimawh tak a nih thu a sawi.

Mizorama Apple chin kawnga hmalakna hi Pu Ronald Sapa Tlau, MP (Rajya Sabha) leh Dr. Sanjay Kumar, Director, CSIR-IHBT-te hmalakna leh theihtawp chhuahna avang a bul tan a ni a. Kum 2016-2017 chhung khan Apple chin hi CSIR-IHBT leh DRDA, Champhai-te’n MGNREGA Programme hnuaiah an kalpui a ni.