Chief Minister Pu Lal Thanhawla chuan mitthi kan inbuaipui dan zawng zawng hi ennawna ngaihtuah ngun a hun tawh nia a hriat thu sawiin khawtlang leh hnam tana thil tha tur zawkah phei chuan huaisen taka ngaihdan thlak ngam te pawh a tul tawh a ni, a ti. He thu thi Pi Vanramchhuangi (Ruatfela nu) lehkhabu ziak, “Mitthi Privatise” tih I&PR Auditorium-a a tlangzarhnaa a sawi a ni.

Lehkhabu tlangzarh vawiin chawhnua neih hi Pu Rosiamngheta’n a kaihruai a, lehkhabu chhung thu thlirlawkna hun Pu L.H. Lianhrima’n hmangin he lehkhabu-in chhiartute kaihhruai a tum dan tlangpui a sawifiah a ni. Khuallian Pu Lal Thanhawla chuan Mizote tluka mitthi inbuaipui thin leh insawngbawl nasa hi an tam a rin bik loh thute, heng zawng zawngah hian mi neinung zawk leh awmtheite thiltih dan la ve a harsa leh leiba nei hial khawpa kan inbuaipui thin dante, thlanmual atana ram zau tak mamawh zel dan leh minungin ram a mamawh ang bawka mitthite ram hauh chungchangah thubuai hlabuai a awm theih dan te sawiin damlo inkan atang reng hian kan tihdan phung tam tak hi chu kalsan ngam a hun tawh a ni, a ti a. Chutiang ang ngaihtuahna tha tak, mi tam zawkte pawhin an vei ruk, nimahsela an sawichhuah ngam si loh, huaisen taka puangchhuaka a bu hiala buatsaihtu chungah lawmthu sawiin khawtlang inrelbawlna thila thil thlakthleng ‘Social reformation’ nei turin hetiang mite hi ramin a mamawh thin a ni, a ti.

He lehkhabu phek 328 bung 23 a thenah hian mitthi insawngbawl dan chungchangte, khawtlang leh veng bil anga la lova mimal anga buaipuizui dan tha zawk rawtnate leh a kaihhnawih thil chi hrang tam tak rawt chhuah niin khawtlang leh sorkar lam chetlakna turte pawh tarlan an ni.