2779/2025-2026

Aizawl the 29th December 2025: Vawiin khan Chief Minister Office hnuaia din Mizo Diaspora Cell chuan an chairman Pu Vanlaldina Fanai, Commissioner & Secretary to CM hmingin Ministry of External Affairs, Government of India-ah email an thawn leh a. Nula Ellen Lalthlamuani, Laos rama awm mek nia hriat chu India Embassy kaltlanga dawr sak turin (Consular Access) an dil.

Ellen Lalthlamuani hi Vietnam-ah zinin, a lo haw tur chu biakpawh zui theih lohin a awm a. A chanchin an hriat rualin Mizo Diaspora Cell chuan Ministry of External Affairs tanpuina hi December ni 22 khan a dil nghal a. Diasporal Cell hian a theih ang anga chhui zui zelin, vawiin hian Laos ramah a awm niin an hre ta a ni. Hei hi an hriat veleh Ministry of External Affairs lamah sorkar leh sorkar indawrna hmanga Ellen Lalthlamuani chungchang kalpui turin an dil leh ta a ni.

Mizo Diaspora Cell chuan a lo sawi fo tawh angin, Mizoram pawn leh India ram pawna zin chhuak leh hnathawkte chu dan zawm tha turin a hriattir nawn leh a. Mahni bungrua ni lo, midangte thil thawn ang chi reng reng, enge a nih hriat chian loh chu, kensak lawmman tha tak pawh nei se, keng lo turin a chah a ni.