2780/2025-2026

Aizawl, 29th December, 2025 : Vawiin tlai dar 3 khan FCS&CA Minister Pu B.Lalchhanzova office MINECO ah IOCL hotu liante leh FCSCA official pawimawh ten Mizorama Oil Depot siam a nih theih nan meeting an nei.

Meeting kaihruaitu FCS&CA Minister Pu B.Lalchhanzova chuan Pu Lalduhoma kaihhruai sawrkar chuan Mizoram mamawh pawimawh tak a ni tih hriain an sawrkar tirh atangin theihtawp chhuaha Oil Depot Mizorama bun a nih theih nan hma an lak thu sawiin Chief Minister in DO letter hmanga a bawhzui reng bakah Delhi lama hotute pawh a biak pawh reng thu a sawi. Minister chuan December thla a Union Minister for Petroleum Pu Hardeep Singh Puri nen inhmuh an tum chu Parliament thlasik thut nen a in nan tak avangin Ministry of Petroleum and Natural Gas (MoPNG) chuan Mizorama oil depot siam chungchang hi official level ah meeting an ko a. December ni 11, 2025 khan FCS&CA Secretary Pi Teresi Vanlalhruaii, MCS chu meeting ah hian zuk telin Mizoram in oil depot a mamawh chhan hrang hrang te a zuk thlen a. MoPNG in Mizoram Sawrkar mamawhna leh ngenna te chu zirhoa sawiho tur a tih angin chumi tih hlawhtlin dan tur kawng dap tura IOCL te hriattir an nih angin vawiin meeting hi neih a nih thu sawrkar thuchhuak chuan a tarlang.

Pu B.Lalchhanzova chuan Mizoram chu a awmna hmun a pawimawh avang te, ruahtui tlak tamna anih avanga inkalpawhna a harsatna a awm thin vangte, KMMTTP kal zelah te , South Asia politics boruak inlumlet avang te leh chhan dang dang vangin Energy security a neih a tul hle thu IOCL hotute a hrilh a. Mizoram Sawrkar chuan a tih theih leh tih ve tur te chu theihtawp chhuah a an umzui tur sawiin tha thlah lova tan la chhunzawm turin FCS&CA leh IOCL officials te chu a chah a, sawrkar chuan hlawhtling ngei turin hma a la zel dawn tih a sawi bawk.

Meeting ah hian FCS&CA Officials te, Aizawl leh Kolasib Bawrhsap te bakah IOCL atangin Pu Nitin Bhatnagar, Chief General Manager (Ops), IOCL leh Pu DK Pathak Deputy General Manager (Ops), IOCL te an tel a ni.