2781/2025-2026 

Aizawl, the 29th of December, 2025 : Vawiin chawhnu dar 2:00 khan Tourist Lodge, Chaltlangah Pu Lalnghinglova Hmar, Minister of State, Tourism hovin Tourism department officer, Sihphir YMA, Sakawrhmuituai Development Committee leh bbyanimals (event manager) ten December 31 a Sakawrhmuituai tlang atanga kumhlui nitla hnuhnung ber thlirliam tur chungchang an sawiho.

Vawiina meeting-ah hian Tourism Department buatsaih ‘Sakawrhmuituai sunset view’ neih tur chungchanga inbuatsaihna kal mek leh hmabak te ngaihthlak a ni a. Mipui pungkhawm tam tura beisei a nih avangin Health & Family Welfare Department atangin medical duty leh police atangin security duty awm tura ruahman a ni. Traffic chungchangah pawh SP, Traffic leh SP, Kolasib te nen tangkawpa ruahmanna mumal tak siam a nih thu meeting-ah hian tarlan a ni.

Sihphir khawtlang hruaitute pawhin phur taka an inbuatsaih thu leh ruahmanna peihfel thawkhat a nih tawh thu an tarlang a. Sakawrhmuituai Sunset programme pual hian security ah volunteer 130 vel an duty dawn a, traffic duty ah mi 70 vel leh, chetsualna thlen thulha che chhuak thei tur response team atan mi 20 vel ruat a training pek an nih thu tarlan a ni.

Tourism Minister Pu Lalnghingova Hmar chuan Sihphir khawtlang chungah lawmthu a sawi a. “Heti zat mihring tha leh hun hi sawrkarin ruai dawn ila kan sum neihin a tlin lo. Sihphir khawtlang hruaitute leh mipuite inpekna ka hmuh hian ka lo beisei thin ‘community-based tourism’ chu a hlawhtling tawhah ka ngai a ni” a ti. Sakawrhmuituai tlang atanga nitla thlirliam chu Tourism Department buatsaih ni mah se Sihphir khawtlang in hlawkpui ber se an duh thu tarlangin, Sakawrhmuituai tlang chu khawvel zau zawka tihlar tlaka mawi a nih thu a sawi a ni.

Tourism Minister chuan sawrkar department hrang hrangte nen thawhhona tha tak an nei thin chu lawmawm a tih thu a sawi a. A huhova ni tla thlirliam hun hmun hrang hrangah buatsaih an tum thu hriat a ni chu lawmawm a tih thu leh, tourist tam zawk hip theihna ni a a hriat thu a sawi bawk a ni.

‘Sakawrhmuituai Sunset’ programme hi December 31, 2025 chawhnu dar 1:00 a tan tur niin, a hmunah stall hrang hrang siam a ni dawn a. Tunlai zaithiam lar tak takte an zai dawn bawk a ni.