Vawiin zing dar 10.30 khan Mizoram Engineering Service Association (MESA) chuan Art & Culture Auditorium, Berawtlang-ah an pawl khawmpui vawi 34-na an hmang a. PHE Minister Pu Zodintluanga chuan he khawmpui hi a hmanpui a ni.

Pu Zodintluanga chuan, “Engineer-te hi ram hmasawnna ruhrel dinna kawnga a sulsutu in ni a, thiamna kawngah pawh mi chungchuang in nih avangin in thiamna ang taka ram tana thawk tura tun aia insangmar lehzual turin ka beisei che u a. Mizo engineer-te kutchhuak chu a tlovin, a thain, a mawi danglam bik tia mipuiin kan sawi hun hi a nghahhlelhawm a ni” a ti. PHE Minister chuan inbiakpawhna te a that tawh avanga awlsam taka hminghliau theih a nih thu sawiin, “Kan hnathawhte hi mipuiin chik takin an thlir reng a, kan thawhrimna leh thiltih that zawng zawngte hi kan thil tihsual pakhatin a hliah bo vek thei a. Chuvang chuan, mipuite hnenah kan ruahmanna te, kan hnathawh te nasa zawka kan hrilhfiah a, kan puan zar loh chuan mipuite nen inlaichinna tha kan nei ngai dawn lo va; fak kan phuna zawnah pawh fak kan hlawh lo fo dawn a ni” a ti bawk.

Pu Zodintluanga chuan Mizoram-a kan kawngpui siam te, kan tui pipe leh electric hrui zam danten mit a tlung tawk lo tih sawi langin, “Heng kan sulhnu duhthusam lo te pumpelh tur chuan Engineer-te hian sawrkar hnathawk dangte anga office dawhkan atanga hna thawk turah inngai lo va, hna kal laite a hmuna vil a, in thiamna leh ruahman dan ang taka hlenchhuah a nih theihna tura in feh chhuah a ngai a. Engineer-te thiamna ang zir ve miah lo te kutah hna vil tura mawhphurhna in pek loh a ngai a ni” tiin a fuih a. PHE Minister chuan Engineer-te chu an hnuaia contractor-te mitmei veng lo tura chahin, an duhthusama thaa hna thawk lo contractor-te chu bill pe lo ngam turin a chah a, “Keimahni lungawina mai piah lamah, kan tu leh fate tana rotling tur thil tha hnutchhiah turin kan vaia kan tanrual a ngai a. Mipuite zarah sawrkar kan nei a, sawrkar hna kan thawh hian mipuite tana hnathawk kan ni tih kan hriatreng a tul hle a ni” a ti.

Er. Lianchungnunga, PWD Secretary pawhin thuchah sawiin, “Engineer-ten kan service-a kan hamthatna tura kan thilphut tam tak Mizoram sawrkarin min tihhlawhtlinsak thin avangin lawm nachang kan hriat a tul a; Sawrkar hnena kan lawmthu sawina chu kan hnathawh hmangin kan tilang tur a ni” tiin MESA member-te a chah.

MESA-ah hian PWD, Power & Electricity Department te, Public Health Engineering Department leh Minor Irrigation Department hnuaia Engineer zawng zawngte an inchhungkhawm a, tunah hian member 372 an awm a ni. MESA khawmpui hian chawhnu lamah anmahni pawl kaihhnawih thilte an rel a; Mizoram Engineering Service Rules leh Examination Regulation thar an neih tak avang te, Mizoram sawrkarin Secretary post pakhat a siamsak avangtein lawmthu an sawi a ni.

MESA khawmpui hi an President Er. Vanlal Tlanan a kaihruai a ni.