Vawiin khan Environmental Science, MZU leh Deptt. of Zoology, Pachhunga University College leh Environment and Forest Deptt te buatsaih nihnih chhung awh tur India rampum huap seminar “Issues of Wildlife Conservation in India with special reference to Mizoram” chu Mizoram University ah khuhhawnna hun hman a ni.

He hun hmanpuitu khuallian Minister Pu H. Rohluna’n, thuchah sawina hun hmangin Mizoramin nungcha humhalh lama hma kan sawn dan te hmuhin a lawmawm thu a sawi a, Mizoram atanga tunhnaia khawvelin nungcha a la hriat ngailoh MZU leh PUC lam zirtirtu leh zirlaiten an hmuhchhuah hriattur a awm thin te chu fakawm a tih thu a sawi. Mizoram chhunga hemi lama a kaihhnawih department hrang hrang ten thawhhona tha an neih theihna’n duhsakna a hlan bawk a ni.

Seminar ah hian Keynote address sawina hun PCCF Pu R. Lalramthanga’n neiin, nungcha humhalh kawnga Mizoram in harsatna a tawh mek te leh la hmachhawn theih tur awm te a sawi a. Nungcha humhalh kawngah mihring leh nungcha te inkungkaihna pawimawh dan te, zirbingna (research) tun aia nasa zawka neih a tul thu leh hmalak theihna tur hrang hrang te a sawi bawk a ni.

Seminar hawnna hunah hian MZU Vice Chancellor Prof. R. Lalthantluanga chuan mikhual zawng zawngte chu lawmna chibai bukin Seminar hlawk thlak tak hmang thei turin duhsakna a hlan a. Seminar thupuiin a tum ang taka theihtawpa tan hona tha leh hmachhawp thar ngaihtuah chhuah a nih ngei a beisei thu a sawi bawk. Hawnna hun hman zawh hian Seminar thupuiah lutin technical session hman zui a ni a. Technical Session ah hian Plenary lecture, Oral presentation leh Poster presentation te awmin ni hnih chhung hun hman a ni ang.

Seminar chhimtute hi India rama wildlife biologist leh scientist te, Mizoram chhunga College zirtirtute, MZU ziritirtute leh University zirlaite anni a, hun hlawk taka hmang tura duan niin, India rampum leh Mizorama nungcha humhalh lam kawnga hma lakna leh hmalak theihna tur tul te an zir ho dawn a ni. Seminar Convener Dr. Lalnuntluanga, Associate Professor Dept of Environmental Science chuan hetianga hun nei thei tura sorkar department lamin inhawng taka University a thawhpui chu a lawmawm a tih thu leh hmasawnna lam kawng kawktu a nih thu a sawi bawk a ni.