Vawiin khan Mizoram Government Doctors' Association(MGDA) chuan Tourist lodge, Chaltlang ah General conference vawi 31-na an hmang a. He hunah hian Health Minister Pu Lal Thanzara chu khuallian atan hman a ni. MGDA Conference hi hun hnih ah then a ni a. Chawhma hunah Doctor pension a chhuakta te thlahna hun, Doctor association tana hnathawk tha chawimawina leh MGDA annual Magazine tlangzarhna hun te hman a nih hnu in chawhnu hun ah erawh chuan MGDA conference a Agenda lutte sawihona hun hman a ni thung a ni.
MGDA Conference vawi 31-na hmanpuitu Health Minister chuan damlo leh mi hrisellote tihdam hna hi hmangaihna leh inpekna thuk tak tel lo chuan thawh theih a ni lova. Damlote thlamuanpui, doctor-te tan chuan khawihmun ah pawh hnathawk thei tura inpuahchah a ngai zual bik a. Hotute, a sawithei awmte leh NGO te an mimal transfer leh posting chungchangah an rawih a thianglo hrim hrim a ni a ti. Hriselna chungchangah hian Zoram khawkilkhawr ber bera chengte te hi hlamchhiah bik a thiang lova. Ram pumpui tuam turin doctor te chu an indaihlohna te hre tho chungin kan sem zai a ngai dawn a. Chutiang order in a den hlawm hunah pawh Doctor-te chu phur taka kal turin a chah hlawm a ni. Doctor tam tak mirethei inenkawlna pawh nei zo ve lo te sum phut miah lova enkawl thin tam tak an awm a. He thiltha hi intih hmuh zel tura chahin zo-nun mawi a nih thu a sawi a ni.
Thingtlang mi harsa zawkte chhawk zangkhai annih theih nan damlo enkawlna leh zai tul te buaipui pawh sawrkar damdawiin ah ngei a tam thei ang bera thawk turin Doctor-te chu chah nghalin Private practice lama inhmang nasa lutuk lo turin a ngen hlawm a. An mahni pawh rilru leh taksa a damlo ve thei tho anih avangin an harsatna te an thawhpui leh an chhungte hnena hriattir fo turin a fuih hlawm a ni.
Health Minister Pu Lal Thanzara chuan Aizawl Civil Hospital chu sum awmsa Rs.5crore leh la dawn tur Rs 40 crore hmanga tih phuisui a ni dawn a. Tertiary Cancer Care Centre, Zemabawk a neihna tur Rs 45 Crore pawh a puitlin thuai nan chak takin Sawrkarin hma a lak mek thu te leh Multi Disciplinary research Unit, Falkawn a din tum pawh Rs 5crore sanction tur atanga Rs 2crore dawn tawh hmangin bul tan mek a nih thu a sawi bawk a ni. Medical College Mizoram in a neih ve theih nan Sawrkar laipui nen inremna thluthlung ziah fel a ni tawh a, hemi kawnga Mizoram hmalakna atana thurawn pe turin India ram pumpuia mi hmingtha Dr.Mohanty chu Adviser to Mizoram atan phal sak a ni tawh a. Reilote ah Mizoramin Medical College a nei ve dawn a ni a ti.
Vawiin a MGDA ten doctor pension ta te an thlah te hi 6 an ni a. An zingah hian Principal Director kalchhuakta Dr.Lalrinliana sailo leh hun rei tak MGDA President lo ni tawh Dr.Gordon Zohmingthanga, MGDA hnathawktha chawimawina dawngtu te pawh an tel a. MGDA conference chawhma programme hi an Vice President Dr.Rohmingthanga Ralte in kaihruai a, chawhnu hun chu an President Dr.K.Lalbiakzuala'n kaihruai ve thungin Dr. C.Lalhrekima'n an pawl chungchang leh hmalakna te report a pe bawk ani.
