Vawiin khan Mizoram sawrkar hnuaia Mizoram Institute of Advanced Studies (MIAS) buatsaihin Chief Minister's Conference Room-ah Mizo history zir nawn leh zirchian chungchangah inrawnkhawmna ‘Consultation on Re-Thinking Mizo History’ tih chu neih a ni a. He inrawnkhawmna hi Health Minister leh MIAS Chairman ni bawk Pu Lal Thanzara'n a kaihruai a ni.
Pu Lal Thanzara chuan khawvel leh hun lo in her danglam zelah hian Mizo history leh Mizo tobul te chiang lehzuala chuia zirchian zawk dan te a awm em tih ngaihtuahna neiin he inrawmkhawmna hi koh a nih thu a sawi a. He hunah mithiam sawm te chu an ngaihdan insit lova, zau taka sawiho turin a sawm a ni.
He inrawnkhawmna ah hian Subject hrang hrang atanga mithiam sawm bikte an tel a. Mizo history kan neih mek chu thuk zawk leh ril zawka zirnawn dan tur an sawiho bakah kan history ziak neihsa dik tawk lo laite pawh chhui nawn a tul thu an sawi a. Hemi atana project kalpui dan tur ruahmanna an siam chu an sawiho bawk.
MIAS hi nakin zela sawrkar laipui nen tangkawpa Mizorama Multi-Disciplinary Research Institute changtlung tak din chhohna tura Mizoram sorkar hmalakna a ni a. Tunah hian New Secretariat Complex-ah office neiin bul an tan mek a ni.
