Mizo chanchin zirchianna 'Mizo Narratives : Accounts from Mizoram' tih lehkhabu, Pachhunga University College, Department of History-a zirtirtu pahnih Malsawmdawngliana leh Rohmingmawii te buatsaih chu vawiin (August 14) hian Pu RL Rinawma, IRS, Principal secretary, Govt. of Mizoram chuan PU College Seminar hall, Life Science Building-ah a tlangzarh.

He lehkhabu hi Mizoram University hnuaia BA First Semester zirlai syllabus mila ziak a ni a, India rama University tha, University of Hyderabad, Jawaharlal Nehru University (JNU), North Eastern Hill University (NEHU) leh Mizoram University (MZU) atanga chhuan mithiam rual ten Mizo history, British hun hma atanga rambuai thleng an chhuina a ni.

Lehkhabu tlangzarhtu RL Rinawma chuan, Mizo history chu sap ho ziak bak a tam loh thu sawiin, Mizo ngei ten mahni history kan ziak ta chu rahbi thar a nih thu leh mi pakhat ngawtin a ziak ni lo, mi hrang hrang ziak chu thil thar a nih thu a sawi bawk a, Mizo historian te chu theihtawp chhuaha tan la zel turin a fuih bawk a ni.

He hunah hian mi sawm bik college zirtirtu, research scholar leh Mizo history lam tui mite an kalkhawm a, Mizo history ziah dan chungchangah sawihona hun an hmang nghal bawk a ni.

Sawihonaah hian Mizo history ziaka awm mek te chu sap missionary leh Bristish sorkar hotute ziah dan zulzuia ziah deuh vek a nih avangin Mizo history dik tak hriat a har thu sawiin 'Mizo' tih chuan Lusei ringawt rinbial lovin, Zohnahthlak dangte a huam thu an sawi hlawm a. Mizo identity hrechiang tur chuan history subject mai ni lo, subject dang nena tangkhawma interdisciplinary research beih ngai nia an hriat thu te an sawi bawk.

Heng bakah hian Mizo history chu a kalkhat thu leh researcher te tan thil tih tur tam tak, labour history lamah te, traditional medicine lamah te, biographic lamah te, environmental history lamah te leh land and space, folklore leh orality lamah te research kawng a in hawn thu an sawi a ni.