Mizo Hlakungpui Muala seng luh thar hla phuah thiam 1 leh thu ziakmi 2- Lalsangzuali Sailo, R. Vanlawma leh James Dokhuma te chawimawina lung chu vawiin (April ni 8) khan Pu T. Sangkunga MLA-in a hawng.

Chawimawina lung hawn inkhawm hi Pu PC Lalluia, Mizo Hlakungpui Mual Committee chairman-in a kaihruai a, Rev. C. Lalngaihthanga, Champhai Karawt Bial Pastor-in tanna hun a hmang a. Secretary Pu Samuel Malsawmtluanga'n Hlakungpui thawh 5-na atana inbuatsaihna leh hmalakna report ngaihthlak hnuhah Khawbung Branch YMA President Pu H.Lalnilianna'n thu a sawi bawk a ni.

Sengluh thar mi 3 - Lalsangzuali Sailo, R. Vanlawma leh James Dokhumate chawimawina lung a hawn hnuah khuallian Pu T.Sangkunga chuan thu sawiin, 'Khuallian atana beisei Chief Minister Pu Lal Thanhawla Tahan Chapchar Kut-a kal a ngaih avang te, Cabinet Meeting a ngaih thut avanga E&F Minister Pu Lalrinmawia chawpchilh taka Khuallian atana beisei a theih leh tak loh avanga a neitu dinhmuna ding tur Khualliana atang chu lawmawm a tih thu a sawi a.Mi 3 seng luhte chu a mimal tak pawha a hriatchian an nih thu sawiin an nuna hriatreng tur thil awm leh chhinchhiahtlak nia a hriatte a tarlang a, Mizo Hlakungpui Mual chu Zofate suih khawm zeltu a nih a beisei thu a sawi a ni. Pu T.Sangkunga chuan a bial chhunga Tlawva Mini-Hydel project hna kal mek leh Khuangthing leh Thekpui inkalpawhna kawng laih a nih tur thu te leh hmasawnna thawh zawh tawh thenkhat a tarlang bawk.

Khuallian leh Bialtu MLA Pu T. Sangkunga a chuan Mizo Hlakungpui Mual thawh 5-na inbuatsaih nan Cheng nuai 2 a pe a, vawiin khan zaithiamte lawmman atan Cheng sing 5 a pek belh leh a, Khawbung Higher Secondary School inenkawl nan Cheng nuai 1 a pe dawn bawk a ni.

Lalsangzuali Sailo, R. Vanlawma leh James Dokhuma chhungte hian chawimawite lung hawnna inkhawmah hian thu an sawi bawk.

Seng luh tharte nen hian Mizo Hlakungpui Mual-ah hla phuah thiam 21 leh thu ziakmi 15, an vaiin mi 36 seng luh tawh an ni. Mizo Hlakungpui Muala chawimawite pual hian ruai buatsaiha a ni a. Ranpui - Bawng leh Sial, leh Vawk talhin Mizo Hlakungpui Mual thawh 5-na hmangtu zawng zawngte'n Khawbung Hmar hmun-ah ruai an theh a ni.