Mizo Hnahthlak International Cultural Festival hmasa ber chu vawiin khan R. Dengthuama Hall a hman a ni. He hunah hian Chief Minister Pu Lal Thanhawla chu khuallian niin, Home Minister Pu R. Lalzirliana chu Khual Ropui a ni a; Art & Culture Minister Pu R.Romawia chu Kut Thlengtu niin Pu JH. Rothuama, Chairman,NLUP Implementing Board chu Khualzahawm a ni. He Festival hi Mizo Cultural Organization leh Art & Culture Department tangkawpin an buatsaih a ni.

Chief Minister Pu Lal Thanhawla chuan chuan Zofate ram hrang hrang a chengte huapzo taka inpumkhatna Kûtpui buatsaih a ni chu lawmawm a tih thu sawiin, a buatsiah tute leh kût tihlawhtling tura palai kalkhawmte chungah lawmthu a sawi a. Zohnahthlakte chu state hrang leh ram hranga cheng ni hlawm mah ila unau kan nihna theihnghilh lova impumkhatna lama hma kan lak tlan zel a pawimawh a ni, a ti a. Zofate inpumkhatna atana Mizoram chhunga chengte an pawimawh in, rilru inhawng taka inpumkhatna Ieh inunauna ti nghet zel tura tan lak tlan a tul thu a sawi a. Chief Minister chuan thlahtu bul intawm kan nih avangin tawng khat hmang vekloo mah ila thui tak kan thusawi kan inhriat sak tlang thei a, chutiang bawk chuan kan inthuamna leh thil dang dangah a inzul hle a, kan inunauna lam kan chhawmnung zel tur a ni, a ti a. Chutihrual chuan kan chenna state leh ram Dan te ngai pawimawh in, Zofate chu khawi hmun a awm pawh ni ila khua leh tui tha tak nih tum ve turin Chief Minister chuan a sawm. Vawiin Cultural Festival hman chuan inlaichinna tha zawk leh inthianthatna nghet zawk a thlen a beisei thu a sawi bawk a ni.

Khual Ropui Pu R. Lalzirliana, Home Minister Zofate chu ram inrelbawlna hrang hrang avangin India, Bangladesh leh Myanmar-ah thendarhin awm in, India ram chhungah pawh state hrang hrangah thendarh kan ni ta zel a; thendarha kan awm avang hian zawi zawiin, kan duh reng vang pawh ni lovin, kan thinlung lam thlengin a lo hrang tial tial ta niin a lang, a ti a. Chutiang a nih avang chuan Mizo hnama chianna hian ramri a kan a ngai a, hnam hian nihna (identity) a ken tel tlat avangin hnam a chian hi mi hawiharh leh hawizau apiangin an ngai thutak a ni, a ti a. Hnam incheina inbel ringawt avanga hnama chiang nia inngaihna a awm theih thu sawiin, incheina ai chuan chhungril lam nihna a chian a pawimawh zawk thu a sawi a. "Mizote hian kan chawr chhuahna, kan tobul hi chiang ila, hma sawn zel chungin kan hnam dinchhuah zelna tur atana tha Io thawhtute zawng zawng hlutna theihnghilh ngai Io ila, hnam hrang hrang karah kan hnam nunze chhuanawm Iai apiang phochhuak uar deuh deuh ila, Mizo kan nihna hi pawnlam thil in a tih khaw loh theih miah lo tur khawpin zahawmin siam iIa, he khawvel hian Mizona hi a ngaisang ang a, mite zingah zum bik takin kan awm reng tawp lo ang," Pu R. Lalzirliana chuan a ti a.

Kut Thlengtu Pu R. Romawia, Art & Culture Minister chuan Mizo Hnahthlak International Cultural Festival a kalkhawm zawng zawng lawmna thu sawiin, hnam inpumkhatna atana cultural festival buatsaih chu thil tih awm reng leh rah duhawm tak chhuah tur nia a hriat thu a sawi a. Khualzahawm Pu J.H. Rothuama, NIB Chairman pawhin a thusawi naah Mizo Hnahthlak International Cultural Festival chu chhunzawm zel tlak nia a hriat thu a sawi bawk.

Vawiin 1st Mizo Hnahthlak International Cultural Festival hi a buatsaihnaah NLUP Implementing Board chu sponsor a ni a. Mizoram chhung leh pawn atangin Zohnahthlak artist leh cultural troupe hrang hrang ten zai leh lam chi hrang hrang an entir a. NIB atangin Pu P.L Thanga, Vice Chairman leh member dangte kalin, Art& Culture Department leh sawrkar department dang atanga hotulu te an tel a. Pu James Lalchhuanawma, MCO President chuan kut inlawmna thu sawiin, Pu R. Hmingthanzuala, Art & Culture Director chuan lawmthu sawiin hun a khar a ni.

May ni 22 atanga June ni 2 chhunga MCO Silver Jubilee puala Hnam Lam Intihsiak lo neih taka tithate hnenah Khuallian, Kût Thlengtu leh Khualzahawm chuan lawmman an sem nghal bawk a ni. He Hnam Lam Intihsiakah hian pakhatna chu Vaivakawn Mizo Cultural Club niin, trophy leh certificate bakah Rs. 50,000 an dawng a, pahnihna chu Hrangbana College Cultural Club niin trophy leh certificate bakah Rs. 30,000 dawngin, pathumna Zofa Cultural Club, Chanmari West chuan trophy leh certificate bakah Rs. 20,000 an dawng thung. Anni bakah hian top ten a lang troupe pasarih hnenah cheng sang nga theuh pek a ni a, participant zawng zawng cheng sang khat theuh pek a ni bawk. Vawiin Festival a lam zawng zawngte lawmman hlan an ni bawk.