Vawiin khan Health Minister Pu Lal Thanzara hoin Parish Hall Kolasib ah 'Initiative of National Cancer Grid -North East Alliance against Cancer Conclave : Mizoram Chapter neih a ni.

He hunah hian Health Minister chuan hriselna chungchanga Kolasib Bawrhsap Dr.Arun T a thahnem ngaihna chu fakawm leh chhuanawm a tih thu a sawi a. Cancer hmuhchhuah/hriatchhuah hma (early detection) lam hawi a zirtirna pe tur bakah cancer natna tuar mekte tanpui dan tur (palliative care) ngaihtuah ho tura Cancer kaihhnawiha thiamna nei sang tak tak phai lam Doctor rawn kal te chu lo lawmin an thiamna leh tawn hriat atanga an thu sawi atang te in kalkhawm te chuan an hlawkpui ngei a beisei thu a sawi bawk a. Pu Lal Thanzara chuan, Research atanga a lan dan in India ramah kumtin cancer case maktaduai khat leh a chanve (1.5 million) hmuhchhuah thin nin heng zinga case 45,000 vel chu hmarchhak bialah hmuh a ni a, heng case zawng zawng atanga za a sawmruk (60%) chu nunphung hrisel vawn loh vang ani, chungte chu vaihlo, zuk leh hmuam bakah ei leh in uluk loh vang te an ni tiin nunphung hrisel zawk chu kan zawh chhoh a hun takzet ani a ti.

Minister chuan tunlaia kan mamawh em em chu Cancer laka inven bakah inenitr ngun leh cancer natna tuar mekte bakah an chhungte tanpui (palliative care) ani tiin, family counseling bakah cancer care programme te, Cancer leh NCD Screening mela te chu hauihawt fo a tul ani a ti a, hemi kawngah hian Mizoram chu kan vannei hle a YMA bakah NGO hrang hrang leh Cancer Society of Mizoram te chuan cancer natna tuar mekte leh an chhungte chhawmdawlna kawngah heng NGO te hian nasa takin Sawrkar an thawhpui a, hei han hlawkna nasa tak a thlen mek ani a ti.

Health Minister chuan Mizoram chu Cancer hluarna State a nih angin Sawrkar pawhin theihtawp a chhuah mek zel a, Mizoram State cancer Institute chu Tertiary Care Cancer Centre ah hlankai ani a, hemi a tan hian Vaibelchhe 44.27 sen tur niin peihfel thuai tura hnthawh mek ani a , he centre hi khum 100 nei Cancer Hospital tur niin hmanrua leh khawl tha ber berte bun tur ani a ti bawk.

Pu Lal Thanzara chuan Cancer natna do mai bakah a natna tuar mekte tanpui leh chhawmdawl (palliative care) tur chuan kan vai thawhho a tul ani tiin Sawrkar, Medical Doctor bakah khawtlang ,kohhran leh Media te chu tih takzeta mahni zawnah theuh hma kan lak a hun ani tiin cancer care, control leh zau thei ang bera inhrilhhriatna (awareness) te chu kalpui angai a ni ati bawk a, he huna National Cancer Grid leh North East Alliance against Cancer mi leh sa rawn kal te chu thawhpui ah a sawm bawk a ni.

Conclave ah hian Cancer chungchanga Mizoram dinhmun chu Dr. Eric Zomawia chuan power point hmangin hrilhfiahna a nei a, Dr. Ravi Kannan chuan North East Alliance against Cancer leh a thil tum chungchangah sawi zauna a nei a, Cancer natna do mai bakah a natna tuar mekte enkawl,tanpui leh chhawmdawl (palliative care) chungchangah zau taka sawihona leh inkawmhona neih ani a, kohhran, khawtlang leh tlawmngai pawl te hmalak theihna tur te sawiho bawk niin Dr.A.Muthamma, Aizawl Bawrhsap in lawmthu sawina in hun a khar a ni.

He hunah hian Cancer kaihhnawiha thiamna neite heng Dr.Ravi Kannan leh Dr.Rajeev Kumar, Cachar Cancer Hospital; Dr.Gauravi Mishra, Professor, Tata Memorial Hospital, Mumbai; Akash Pradhan, Tata Trust; Sumitha TS, Project Officer, Pallium India, Trivandrum; Ashima Sarin, Director Sambandh Health Foundation, Gurgaon; Dr.Eric Zomawia, Dy.Director (H&ME), Dr.Jeremy L Pautu Consultant Medical Oncologist, Dr. RL Sanghluna, Senior MO, Synod Hospital bakah        Dr .A.Muthamma, DC Aizawl, Brig MS Mokha 23 sector Assam Rifles te an kalkhawm a, anni bakah hian khawtlang aiawhin Central YMA Executive Member 2 leh Kolasib atangin Medical Officers te bakah Sub.Hqrs YMA,MHIP,MUP, Mizoram Cancer Care Foundation, Kolasib leh kohhran aiawh te an tel tha hle a ni.