Vawiin khan I&PR Minister Pu Lal Thanzara’n Electric Veng YMA Hall-ah Electric Veng Branch MHIP te buatsaihin MHIP Day Vawi-44na lawmna a hmanpui.

Pu Lal Thanzara chuan Mizo hmeichhiaten nasa takin hma an sawn a, zirna lamah leh eizawnna kawngah an thang nasa hle, a ti a. Mizoram sawrkar pawhin Mizo hmeichhe dinhmun siam tha turin dan pawimawh tak The Mizo Marriage, Divorce and Inheritance Act a siam a, he dan hian Mizo hmeichhe dinhmun thalo tak thin kha a humhalh a ni, a ti. Nute rawngbawlna hmasa ber leh pawimawh ber chu chhungkua a ni a, pawn lamah nute’n hun tam zawk an hman a, in lam an ngaihthah chuan chhungkua a buai thin tih sawiin Minister chuan chhungkaw phuarkhawmtu, inremna leh lungrualna siamtu an ni tih hre thar leh turin a chah a. MHIP Day ah hian Mizo hmeichhiaten chhungkua leh khawtlanga an pawimawhzia hria a, nu tha, mo tha, fanu tha nih tum theuh turin a fuih a ni.

Electric Veng MHIP te hian Mizoram sawrkar khap gutkha product engemawzat an man chu vawiin khan Pu Lal Thanzara nupui Pi Zohmingthangi Sailo in a hal a. Kumin January ni 1 leh May ni 19 a gutkha an man te hi shikhar bawm (box) 7, SS I bawm 8, S 10 packet 187, rajnigandha packet 52 leh raja tobacco packet 14 a tling a ni.

MHIP Day ah hian an member kum 70 tling chin mi 117 hnenah Electric Veng MHIP te hian chawimawina an hlan a. An Secretary Pi Zonunpari’n an pawl hmalakna report a pek bakah MHIP General Headquarters Adviser Pi Vanlalruati hovin kumpuan an zir ho a, an Asst. Secretary Pi Lalhmangaihi’n MHIP General Headquarters President thuchah a chhiar chhuak bawk.  Vice President Pi C.Hmingthanmawii kaihhruai MHIP Day lawmna-ah hian Local Council, MUP, YMA leh VDP hruaitute bakah MHIP member thahnem tak an tel a ni.