Kumin 2018  MHIP Day  chu  Mizoram hmun dang danga MHIP Branch hrang hrang te’n an hman rualin Mission Vengah pawh Synod Conference Centre ah  Lt.Col.ZS Zuala  MLA leh  Pi Margaret Zohmingthangi   Chair person,Women Commission te hovin  hman a ni.

Mizo hmeichhiate hmasawnna  leh  finna leh thiamna a an chhuanawm tawh zia  sawiin khuallian  Pu ZS Zuala  chuan  ram hmasawnna  tura  thawh kawngah  pawh  ngaihtuahna  fim tak nen  ke pen zel tura fuihin, Mizo hmeichhiate chu sawrkar hian thlahthlam lovin chanvo a pe tha em em a, Local Council, Village Council leh MLA ah te pawh hmeichhe chanvo chawisanna atan duhsak takin hma a la thin a ni a ti.

Khual zahawm Pi Margaret Zohmingi  pawhin thu  sawiin Mission veng chu a pianna leh seilenna anih avangin neitu nihna rilru vawiinah hian ka pu hle a, MHIP Mizo nu te hian keimahni, kan chhungkua, kan Kohhran leh kan ram tan zing kan thawhhlim atangte hian Lalpa auh hi kan tih hmasak ber tur a ni a, chubakah sawma pakhat hi ngai pawimawh ila, kan chenna inah te, kan hun hmanah leh kan tawngkamahte hian sawma pakhat tal hi chu Pathian duh zawngin kan intilang tur a ni a ti.

Mission Veng Branch MHIP President Pi Lalnipuii  kaihhruai MHIP Day lawmnaah hian Pi Lalbiakengi Secretary in  MHIP  hmalakna leh  hriat tur  pawimawh te   puangin  Pi Hmingliani Vice President   in MHIP  Hqrs  thuchah  a chhiarchhuak a. Pi Lalhmachhuani  Assistant Secretary  hovin  member chatuan ram pan ta te sunna  hman a ni. Mi bik chawimawina  thilpek te hlan a niin  MHIP member te  chu group  li (4) a inthenin  Indopui 2 na hun laiin mizo nula leh tlangvalte pawh ral beiin an kala chumi chawia Pu Rokunga hla phuah ‘Lentupui chawivel leh romei chhumin’  tih hla leh  MHIP  thu vawn  te a intihsiak  a ni a.Chawhnu lamah  football  khela inel  leh aniin tlai lamah  zanriah kil ho a ni.