Vawiin chawhma khan Food Civil Supply & Consumer Affairs Minister Pu John Rotluangliana chuan Lengpui Govt Middle Primary School III-ah Lengpui Model Branch MHIP member te buatsaih, MHIP Day vawi 44-na lawmna programme, chu a hmanpui.

Khuallian Pu John Rotluangliana chuan Mizo hmeichhiate chu an chhuanawmin kawng tinrengah Mizo mipate aiin hma an sawn tawh zawka thil lawmawm tak a ni a ti a. " lAmaherawh chu ram leh khawtlang hmasawnna tinreng intanna hmun chhungkua te  kan han bihchianga, chhungkuaa dinhmun pawimawh tak luahtu chhungkawnu ber ten tan an lak thar leh a ngai niin a lang. A chhan chu kan fate dinhmun en hian, faten an nel zawk leh kan Mizo khawtlang nuna fate kaihruaitu bertu chhungkaw nu ber te hi chhungkaw rawngbawlna kalsan in pawnlamah an chhuak tam ta deuh em ni aw. Kan faten zirtirna tha an dawng tlem ta deuh em ni aw tih theihin kan fate nun en hian siam that ngai chu a awm a ni. Tun anga zan mut hun hrelo zing thawh hun hre lo, hawihawmna nachang hre lo leh thahnem ngaih nachang hrelo kan fate an nih zel chuan kan hma lam hun a englo hle a ni. Chuvangin chhungkaw nu ber ten fate an enkawlna leh chhungkaw rawng an bawlna kawngah tan an lak thar leh a hun a ni", a ti.

Supply Minister Pu John Rotluangliana chuan Bazar, sawrkar office leh eizawnna kawng hrang hrangah a zeihawi zawk leh a tam zawk chu hmeichhiate an ni tawh a. Khawtlang rorelnaah pawh sawrkarin a ngaih pawimawh avangin an tel vek tawh a, hmun tam takah phei chuan hmeichhiate VCP an ni a, Village Council tinah VC member an ni tawh tih a sawi a. "MHIP Day hi kan hnam tan ni pawimawh a nih angin he hunah hian hnam tana kan tan a hun tawh zia te, All India Services leh central service-ah te kan bula khawsa hnamdang te kan  tluk loh hlauhawm zia leh a tlawm thlak tur zia te kan hriat thar a tha in ka hria. Hnam dang khum tumin kan tang anga hnam dangte pawh thianah kan siam a ngai bawk a ni, kan theihna te a san rual hian chaklohna kan neih chu hnam anga kan inla bing lutuk leh hnamdang kan ngaitheilo hi a ni. Tin, kan pi leh pu ten hnamdang kohna atana  an hman hming pakhat huam chhungah Bengali, Punjabi, Bihari, Bangladeshi, Assamese leh a dangte kan khung vek hi ngun tak ngaihtuah chian a hun tawh a. Tu tute nen emaw inhmuhthiam loh changa rampumpui dotu anga than te hi kan tan a hlawk lo thin hle a ni", a ti. 

Lengpui Model Branch buatsaih MHIP Day lawmna programme hi Pi Zothansangi'n a kaihruaia, member te hian thupui neiin  inelna an buatsaih te nen hun hi an hmang a ni.