Vawiin khan  Pi Vanlalawmpuii Chawngthu Sericulture, Fisheries leh Co-operation changtu Minister chuan a bial chhung Sailulakah MHIP Day vawi 44-na khuallian niin a hmanpui a. Hemi zawh hian Sailulak High School chu a hmunah kalin an mamawhte a enpui nghal bawk a ni. 

Sailulak Community Hall-a MHIP Day hmannaah Khuallian chuan MHIP member kalkhawmte hnenah chuan Mizorama  hmeichhiate dinhmun that chhoh tawh hle thu a sawi a. Sawrkar hmalaknain hmeichhiate dinhmun nasa taka  chawikan  niin, Sawrkar chuan hmeichhiate leh Naupangte chhawmdawlna tur Women & Child Development lam buaipuitu tur pawh din tum a ni, a ti a. Kalkhawmte hnenah chuan  chawimawi leh chawisan tlak ni tura nun hmang thiam thei tura awm  erawh angaih thu a sawi a.

Pi Vanlalawmpui Chawngthu chuan Mizo hnam chimral a kan awm lohnan Zirna kawngah tanlak angaih tawh takzet thu leh  hemi kawnga hian nu leh pate  mawhphurhna a sang hle a ni, a ti a. Tu leh fate chinchang hrechianga, ram leh hnam tana mi chhawrtlak  tu leh fa te chherchhuah kawnga tan lak angaih thu a sawi bawk a. MHIP thupui vawn tlat  'Mite Tanpui' tih chu ropui a tih thu sawiin, MHIP member-te chu  mite tanpui theitu nih tum zel turin a chah nghal a ni.

Vawiin hun hi Pi Vanlalchawii, President, MHIP Sailulak chuan a kaihruai a. Pi Sangkhumin kalkhawmte lawmna thu a sawi a. Member boralte sunna hun neih a ni a. MHIP Day pualin intihsiaknate neih niin hun hlimawm tak nilengin hman a ni. Sailulak MHIP hi 1974 kum a din niin tunah hian member 306 an awm mek a ni.

Vawiin vek khan bialtu MLA chuan High Light School,Sailulak chu tlawh nghalin Zirtirtute leh Zirlaite chuan lawm takin an lo dawngsawnga, mamawh leh harsatna an neih hrang hrangte pawh Bialtu MLA hnenah hian an lo thlen a ni. An mamawh lo thlente tihsak ngei anih theih nan Bialtu MLA chuan hmalakpui zel a tum thu a sawi bawk a ni.