Vawiin khan Directorate of Science & Technology buatsaih ‘Sensitisation Workshop on Protection of Mizo Indigenous Goods under Geographical Indication Registration’ chu Planning Department Conference Hall-ah, Planning (Science & Technology) Secretary Dr. C. Vanlalramsanga'n a hawng a.

Khuallian, Dr. C. Vanlalramsanga chuan Sorkarin Mizo hnam thilte humhalh a ngai pawimawh thu sawiin, tunlai khawvel thang chak tak karah hnam hrang hrangte hi kan intlawhpawh chakin media lamah kan thang nasa em em a, chuvangin hnam anga kan thil neihte venhimna lamah hma kan lak chak a tul hle a ni, a ti a. Khuallian chuan tunlai changkanna hmangin Mizote hian khawvel hmaa inphochhuah theihna hun that tam tak kan neih avangin, “Sorkar pawhin Mizo hnam thil hrang hrangte venhimna tur chi khat ‘Intellectual Property Rights’ pawh mumal takin a enkawltu tur bik Department-te a siam chho ta zel a ni,” a ti bawk.

Workshop kaihruaitu, Chief Scientific Officer Dr. R.K. Lallianthanga pawhin thusawiin “Tunlaia thiamna leh dan chi hrang hrang lo chhuak thar zel te hmangin Mizote’n hnam anga rohlu kan neih tam takte chu a humhim ve theih tawh a, a bik takin Geographical Indication Act hnuaia heng kan hnam thil chi hrang hrang register theihte kan ziah luh theih chuan Mizote ta an nihna pawh dan hnuaiah a humhalh theih dawn a ni,” a ti bawk.

He Workshop-ah hian Sorkar Department thenkhatte bakah tlawmngai pawl te an tel a. Resource Person pathum: Pu Benjamin Vanlalruata, Project Scientist, Patent Information Centre; Pi Boichhingpuii, Director (Rtd.), Art & Culture Department; leh Pu Samuel Lalmalsawma, Scientific Officer, Patent Information Centre-te chuan Intellectual Property Rights pawimawhnate, Mizo Puan chanchinte leh Mizo hnam thil neih chi hrang hrangte Geographical Indication Act hnuaia humhim a nih theih dan tur chungchangahte zirtirna an pe a ni. Dr. Lalnunsiama Colney, Senior Scientific Officer, Directorate of Science & Technology kaihruainain Mizote thil humhim ngai nia hriat chi hrang hrangte sawihona neih a ni bawk.

Attachment

  • Loading attachment...