Ni 2 awh tur Mizo Infiamna Kutpui chu July ni 10 khan North Vanlaiphai khuaah hman a ni a. Pu Ngurbiaka, Director of Art & Culture chu khuallian niin Pu Zaliana, Senior Research Officer, Tribal Research Institute chu khualzahawm a ni.

Pu Ngurbiaka chuan Mizo te hnama dintu Pathianin a pek infiamna chi hrang hrangte mahni ta anih ang taka hlut thiam tur leh chawisang zel turin infiam mite a chah a. Mi tihdan kan zir bakah kan tihdan, kan hnama bet tlat te hmang tangkai a tihmasawn turin thalai te a fuih.

Mizo infiamna Kutpui hi YMA Branch 8 te atangin intihsiak turin thalai engemawzat an thawk chhuak a. Pu Lalhruaitluanga, President, Chaltlang Branch YMA kaihhruaiin Mizo infiamna chi hrang 11-ah intihsiakna neih a ni. Mipa inelna item 6 leh hneichhe inelna item 5 te a awm a. A hawn ni hian inelna tan nghal niin July ni 11-ah final khelh a ni ang. Item tinah lawmman pakhatna atanga pathumna thleng siam a ni.

Lawmman hetiang hian siam a ni. Team inelnaah pakhatna Rs. 2,000, pahnihna Rs. 1,500 leh pathumna Rs. 1,000. Mimal (Individual) pakhatna Rs. 1,000, pahnihna Rs. 700 leh pathumna Rs. 500. A pumpuia pakhatna lawmman atan Rs. 7,000/ leh pahnihna Rs. 5,000 a ni.