World Population Day, 11.7.2014 chu Lawngtlai District ah pawh hman a ni a, he ni hmanna inkhawm Lawngtlai DC Conference Hall a neih ah kumina World Population Day thupui “Planned Family, Endless Happiness” zir hona leh sawi hona hun hman a ni.

World Population Day hmanna inkhawm ah hian Lawngtlai Bawrhsap Pu J. Hmingthanmawia chu khuallian a ni a, khuallian hian Day thupui “Enkawl zawh tawk fa neih hi, hlimna tluantling a ni (Planned Family, Endless Happiness)” tih thupui hmangin thusawina hun a nei a, mihring pung zel vanga khawvelin harsatna a tawh hrang hrang a tarlan bakah India leh Mizoram ngei pawh in harsatna kan tawh dan leh kan hmabak ni a a hriat tlangpui te a tarlang. Population Control kan tih hian mihring piang tih tlem kan tumna a ni ngawt lova kan zawh tawk leh a tha thei ang bera kan enkawl theih tawk a tam fa i hring ang u tihna ni bera a hriat thu a tarlang a ni.

Khuallian in thupui a sawi zawh hian he hmuna kalkhawm te chuan thupui behchhan hian sawi hona hrang hrang an nei a, hriatchian loh leh hriat duh an neih ang ang te Dr. HC. Thangkima, CMO Lawngtlai leh Dr. Lalrochhuanga, DMS Lawngtlai ten an hrilhfiah a ni.

He inkhawm hi Dr. H.C. Thangkima, CMO Lawngtlai chuan kaihruaiin Mizoram Sawrkar in mipuite hriselna tur leh changtlung zawk a fanau kan enkawl theih dan tura ruahmanna a siam hrang hrang te a tarlang a, Lawngtlai District chhunga sawrkar hmalakna hrang hrang te chipchiar takin a tarlang bawk.