Vawiin khan Health Minister Pu Lal Thanzara hovin I&PR Auditorium-ah World Population Day hman a ni a. Kumin hian thupuiah ‘Chhungkaw ruahmanna tha - Hlimna tluangtling’ tih chu hman a ni.

Pu Lal Thanzara chuan ‘World Population Day’ hian fa neih tlem emaw neih tam emaw inzirtirna ringawt a kawk lova, he Ni in a tum ber chu khawvela mihring cheng zat lo pung zelin a nghawng tha leh thalo te inhrilhhria a, awmze nei zawka khawvel kan luah theih nan ruahmanna tha nei chunga chhungkaw din tura mipui zirtir a ni, a ti. Kumina thupui thlan chhuah ‘Chhungkaw ruahmanna tha - Hlimna tluangtling’ hian chhungkaw hlim, nuam leh ngelnghet neih a pawimawhzia te, nupaa insiam dawnin ruahmanna felfai neih a tulzia a tarlang a. Nu leh naute hriselna ngaihtuah chunga, sum leh pai thawhchhuah mila kan enkawl zawh tawk leh chawm theih tawk fa neih inzirtir hi a pawimawh ber a ni, Minister chuan a ti.

National Health Mission peng pakhat Reproductive & Child Health-a State Programme Officer Dr R.Lalthanga pawhin he ni hman a nih chhan leh a tobul te a tarlang a. Mizoramah chuan fa neih tlem inzirtir ringawt hi thil tul ber a ni lova, naupang piang chhuak zawng zawngte dam khawhchhuah na tur leh a enkawltu nu hriselna ngaihtuah hi a pawimawh ber a ni, a ti a. Hospital awm lohna ah pawh Health Sub Center tala nau neih te, rai laia damdawi lama thiamna nei te thurawn ngaih pawimawh te, naupang hrisel nan a hringtu nu hrisel a tulzia hria a chhang zing taka naupai loh inzirtir te a tul hle a ni, a ti bawk.

Kum 1968 khan khawvel ram hrang hrang hruaitu kalkhawmte chuan mitin hian fa neih tam lam kawngah duhthlanna thiang leh dikna, chanvo kan neih theuh thu an lo puang chhuak tawh a. Chumi atanga kum 40 ral hnu kum 1989 khan United Nations Development Programme chuan ngaihdan thar neiin a hma kum 1987-ah khawvel mipui awm zat tluklehdingawn 5 a lo tlin takna ni July ni 11 chu World Population Day atan a lo puang ta a. United Nations Population Fund kaihhruaina hnuaiah sorkar, tlawmngaipawl, zirna in leh mimal huam vekin he hun hi inzirtirna ni atan hman a lo ni ta a ni.

Kum 2011 census-ah chuan Mizoram population hi 10,97,206 a lo kai ta a. Health Department in a chhut dan chuan 2013-14 ah chuan 11,15,597 a kai tawh rin a ni. Mi 1,14,048 te chu fa nei thei tura ngaih an ni a, heng zinga 41,031 te chu nau nei theilo tura invenna la an ni. Damdawi in leh Sub Center a nau neih nachang hria chu za zelah 87 an ni a, kum 2013 khan naupang kum khat hnuai lam thi mi 738 awmin mi 1000 zelah 35 thi ang an ni.