Vawin chawhma dar 10:30 khan ni hnih awh tur North East Zone Cultural Centre, Art & Culture Department, Mizoram leh Sub-Headquarter YMA, Serchhip-te tangkawpte huaihawtin Serchhip Field No.-II-ah Mizo Infiamna Kûtpui vawi 4-na hman a ni a, Pu Zolawma District Education Officer, Serchhip chu khuallian a ni.

He hunah hian Pu Zaliana, Senior Research Officer, Tribal Research Institute, Art & Culture Department chuan he kût hman a nih chhan leh an lo kalpui tawh dan tlangpui te a sawi a. Khawvel hmasawnnain zawi zawia kan hnam nunphung leh ziarang hlu tak takte min nuai bo sak zel avangin kan hnam ro hlute humhalha chawi nun zel nan hetiang kut hi siam a ni a ti a. Kum 2008 khan Sialhawkah nei tannin hlut a hlawh hle a, 2009-ah Aizawl khawpui chhung Chaltlangah nghah leh a ni a, rinphak baka a hlawhtlin thu leh 2010-ah pawh hlawhtling takin Kolasib-ah hman a lo nih tawh thu a sawi a.

Kuminah Serchhipa nghah a nih chhan sawiin Pu Zaliana chuan Serchhip chu Mizoram hmun laili ber a nih avangin kan hnam ziarang, nunphung leh hnam rohlu ten ngaihhlut an la hlawh leh hlawh loh enna tur darthlalang tha leh rintlak bera an ngaih vang a nih thu a sawi a. Tin, inelna ang ringawt ni lova KÛT anga kalpui an duh chhan pawh sawiin, inelna rilru dah lian lutuk lova hlim taka mahni hnam ro leh thil hlute thangtharte mithmuha pho lang zel tur leh vawn him zel chu an tum ber a nih zawk thu a sawi bawk a ni.

Khuallian Pu Zolawma DEO pawhin thu sawiin mahni hnam tihdan bosala hnamdang tih dan ringawt entawn chu hnam boralna a ni a, hmasawnna leh culture chu kal kawp tlat tur an nih avangin kan Mizona tel lova changkan kan tum chuan kan hnam hi a boral mai dawn a ni a ti a. Hmana kan infiamna tam tak thangtharte hriat hlawh phak tawh lote, tunlai mite hmuh tura pho chhuah leh an ni tur chu lawmawm a tih thu sawiin vawng nung reng a chawi lar zel tur leh hlim taka kût turin kalkhawmte a chah bawk a ni.

He Mizo Infiamna kûtpui hi naktuk ni 20, October 2011 chawhnu dar 1:00 hian Pu. PC Zoram Sangliana, Art and Culture Minister-in a khar ang.