Vawiin chawhma khan Mizo Students' Union 18th General conference ni thumna 'Vantlang Inkhawm' hman chhunzawmnaah Pu K Lalrinliana, Minister of State for Food, Civil Supplies & Consumer Affairs department chuan khuallian niin a hmanpui.

Minister Pu K Lalrinliana chuan Mizo Students' Union chu mahni aia mahni zirlaipuite hmakhua ngaihtuah a, ram leh hnam tana ke penchhuak thin an ni chu fakawm a tih thu sawiin 'Mizo zirlaite thlavang hauhtu leh mawhphurna hlenchhuak kawnga Zirlai pawl chak tak kan nei hi a thlamuanthlak hle a ni', a ti. Pu K Lalrinliana chuan, ram chhunga ration buh semte chu ram pawn atanga chah luh thin a nih thu sawiin,' Zirlaite chu ei leh bar a intodelhna kawngah tan lak a ngai a, awmze nei zawka zirna kalpuia, kan ram hausakna haichhuah kawnga thiamna neih tuma zir a tul hle a ni,' a ti. Minister chuan ei leh bar a kan intodelh theih nana kawng pawimawh tak chu kan ram hausakna, kan ban phak a awmte hriatchian a, tangkaia hman thiam a ngaih thu a sawi a, hemi kawnga ngaihtuahna seng thin turin zirlai kalkhawmte a chah bawk a ni. Minister chuan ramri humhalh nan ramri hrul a chen peih a tul thu a sawi a, kawng hrang hranga buhfai, thlai, sa, sangha, gas leh oil a kan intodelh a tul thu sawiin Gas bottling plant leh oil depot neih nan Mizoram sawrkarin hma a lak mek thu a sawi. MSU 18th General Conference chu member ten he zirlai pawl dinchhan hre thar a, a thil tum hlenchhuan nan leh mizo zirlaite hmasawn nana hmalak a ngaih huna hma hruaitu an ni tih an hriat thar leh na hun atana hmang turin khuallian chuan zirlate chu chah in duhsakna a hlan bawk a ni.

Pu Vanlalliana Khiangte, President MSU chuan thu sawiin, Mizote hi hnam dangte hian eng angin nge min hmuh tih hi in zawh fo a tul a, mahni in enlet a insiamthat kan ngaihna lai apaingah insiamthat kan tum tur a ni, a ti a, Zirna hi kan ram leh hnam humhalh nana hmanraw tangkai ber a nih thu leh hmasawnna atan thil tangkailo ngaihven a, hun leh tha seng vak vak lovin zirna leh thiamna ngaihsanna chang hre thar turin kalkhawmte a chah.

MSU 18th General conference a rorel thupui 11 pawm ngaihthlakna hun hman a ni a, chung zingah chuan Mizoram border check post changtlung zawk leh a enkawltu tur battalion thar din a nih theih nana hmalak te, Zirtirtu aikal late zawn chhuah leh hrem an nih theih nana hmalak te, Computer based online exam centre changtlung zawk neih nana hmalak te leh Mizoram chhimthlang mizo awmna khuate hi zofate chenna tlaka sawrkarin a enkawl theih nana hmalakte a tel a ni.

Vawiin conference hi Pu J Lalmuanzuala, Vice President, MSU in a kaihruaia, hruaitu inhmelhriattirnate neih niin member zinga zirna atana thawhhlawk zualte chawimawina hun leh MSU district headquarter, Headquarter, Sub-headquarter leh branch titha te thlan chhuah niin MSU district Headquarter Kolasib, Headquarter Saitual, Sub-headquarter Bairabi leh Pangbalkawn branch te hnenah chawimawina hlan an ni. Khuallian Pu K Lalrinliana'n MSU 18th General Conference Souvenir 'KULVA' tih lehkhabu tlangzarhna hun neiin Kulva Cultural Club, RM English School, Bairabi leh Govt. Aizawl College Cultural club ten hnam lam entirnna hun an hmang a zaithiam hrang hrangten zaiin kalkhawmte an awi bawk a ni. Palai hi MSU branch hrang hrang atangin zirlai 1200 vel an tel a, India hmarchhak state 7 a NGO intelkhawm ina an din North East Forum for Indigenous People (NEFIP) atangin chhimtu an rawn kal bawk a ni.