Vawiin khan Govt. Mizo High School leh Govt. Mizo Higher Secondary School, Aizawl te chuan an school dincham Vawi 75-na Platinum Jubilee, Mizo High School Field-ah an lawm a. Lawmna Inkhawmah hian Home Minister Pu Lalchamliana chu Khuallian a ni a, Education Minister Pu Lalchhandama Ralte chu Khualzahawm a ni. Principal Pu Lalthanzama chuan chuan he hun hi kaihruaiin, Minister te hi Bialtu MLA Pu Lalmuanpuia leh AMC Councillor Pu Rosiamngheta ten an tawiawm bawk a ni.

Khuallian Pu Lalchamliana chuan thu sawiin lehkhathiam hi sawrkar hna thawh nan chauha hmanglo a, midangte hna thawh tur siamsak theitu atana hmang turin zirlaite chu rilru ngaihtuahna nei turin a ngen a. Hlawhtlin nan taimakna leh thawhrimna bak a awmlo a, school kal lai atanga nun uluk turin leh ngaihsan tur dik tak ngaisang turin a fuih bawk a ni. Mitinin mahni hmazawn theuhah tih theih tawk neiin, mi ram angin Zoram hi awm se hranghluiten an lo tih vangin nunna tam tak chan an awm tih hre thar leh turin a chah bawk a, ram leh hnam tana chhen fak awm ni turin Platinum Jubilee Lawmnaa lokal zawng zawngte duhsakna a hlan bawk a ni.

Khualzahawm Pu Lalchhandama Ralte pawhin thu sawiin ram mamawh ber pakhat chu  zirna lama Harhtharna hi a ni, a ti a.  Education pawimawhna hi tun aia nasa zawkin lian se, ram siamna hnukpui anih avangin ngaih pawimawh ni leh zual ni se, tiin a sawi a. Minister chuan Education Department in hmun hrang hranga ram a neihte chu mimal leh vantlang ten humhalh pui turin a ngen a, education hian hmun sang chang se, zirlai nih laiin hnam rilru pua zir zel turin leh rual u zawkte sulhnu chhuiin, zirnaah thahnem ngaia Central Sawrkara a tam thei ang ber zofate thawk turin zirlaite a chah a ni.

Chawhma Session ah hian School Platinum Choir ten Halleluiah Chorus sa in hun an hawng a, Kum 1944-a Govt. Mizo High School Batch hmasa ber Pi Rozami, Mission Veng chuan hunserh a hmang a; Organising Secretary Pu Lalnunpuia Hrahsel chuan Report tawi pein, Celebration & Publicity Committee Chairman Pu Lalrinkima kaihruaiin he school thawk tawh leh lokal tawhte sunna hun hman a ni. Platinum Jubilee lawmnan thu tawi mi hrang hrang hnen atangin ngaihthlak a ni a, Khuallian Pu Lalchamliana hian Platinum Jubilee Lungphun a hawng nghal a, chawhma session hi Pu Hmingchungnunga, Headmaster chuan lawmthu sawiin a khar a ni.
Chawhnu Session hi Pu David Zaikhumtluanga leh Pi Zorinpuiin ten kaihruaiin, group dance leh zai ngaithlak a ni a, rual hlui te pual Inkhawmhona pawh Mizo High School Hall ah buatsaih a ni a, Jubilee ruaiin a zui nghal a ni.

Jubilee lawmna denchhen hian October Ni 4 khan Jubilee Walk neiin, Aizawl Khawpui thenfai hnatlang High School leh Higher Secondary zirlai ten an nei tawh a, Thutak Nunpuitute Team (TNT) pualin thawmhnaw, ei tur leh thil chi hrang hrang la khawmin, luangchhuahna hun an hmang a, hemi ni vek hian Jubilee Football March, Lammual ah khelin zirtirtu leh zirlai ten intihhlimna an nei bawk a ni. October Ni 7 khan NSS Unit ten Civil Hospital a hman tur thisen Unit 98 an pe bawk a ni.

Mizo High School hi Mizoram a High School Upa ber niin February Ni 25, 1944 khan din than a ni a, Sap Missionary Rev. J.M Loyd-a chuan bul tanin Headmaster hmasa ber a ni a, Kum 5 chhung hlawh neiloin a thawk a ni. Kristian Missionary bul tan pui a nih avangin inkaihhruaina pawh khauh taka kalpui a ni a, tuna school awmna hmun hi MacDonald Sap-in a pek a ni a, amah hriatreng nana ‘Mac Donald Hill’ tih a ni. Tun dinhmunah hian High School Section-ah Zirlai 700 chuang leh Higher lamah zirlai 900 vel an awm mek a ni.