No.2993/2021-2022

Aizawl, 15th November, 2021: Tukin khan Mizo Grammar Society hruaitute chuan Pu L.Thangmawia, Vice Chairman, HRD Board chu a chenna inah hmuin Mizo tawng hmasawnna tura Mizoram sawrkar-in Mizo Language Board (MLB) din tura chak taka hma a lak mek naah lawm thu an hrilh a, an pawl hmalakna leh rawtna hrang hrangte an thlen nghal bawk.

Pu L.Thangmawia chuan MGS hruaitute hi tha taka lo dawng sawngin tuna HRD Board in MLB din tura hma a lakna te chu Chief Minister-in Mizo tawng hmasawnna a ngaih pawimawh avang leh HRD Board hnena hmala tura a tih vang a nih thu a lo hrilh a, harsatna dang a awm loh chuan kumthar budget session-ah he MLB bill hi Education Minister Pu Lalchhandama Ralte chuan Assembly House-ah a put luh hman beisei a nih thu a lo hrilh a ni. MGS ten hlawh nei lo va zofaten Mizo tawng dik zawk kan neih theih nana an hmalakna te ropui a tih thu leh chhuanawm a tih thu te lo hrilhin lawmthu a lo hrilh bawk a ni.

MGS hruaitute chuan Mizo tawng chungchanga inhnialna tam tak hi Grammar atanga chinfel theih a nih thu sawiin hnam humhalh nana Mizo tawng dik a pawimawh zia an sawi a. MBSE hnuaia Mizo Language Committee (MLC) ina Mizo tawng ziah dan (3rd Edition) a siam chungchangah rawtna an thlen thu te, MBSE atanga ngenna an dawn bawhzuia pawl 9 atanga pawl 12 inkar Mizo zirlaibu MLC kaihhruaina nena inmil lo an zirchian mek thu te an sawi bakah DDK leh AIR ah Mizo tawng Grammar pawimawhna leh tangkaina lam hawi programme an neih mek thu sawiin, Mizo tawng chungchanga sawrkar hmalakna kawng hrang hrangah MGS in tangkaina an neih chuan theihtawp chhuah an in huam thu an sawi bawk a ni.

He inkawm honaah hian Mizo tawng hmasawn nan leh hnam inpumkhat nan khawvel hmun hrang hranga cheng zofate nen biakhmuhtheihna hmanga Mizo tawng inpawl khawmna (International Webinar) nei turin MGS leh HRD Board ten hmalak tlan nise an ti a, remchang hmasa bera he programme huaihawt turin inbuatsaih chhunzawm nghal nise an ti bawk.

MGS hruaitute hi an President Pu R.Lallawmzuala, Vice President Er Vulmawia, General Secretary Lalengmawia Kawlni, Fin. Secretary PC Thangzikpuia leh an member Dr R.Lianngenga te an ni.