No.3110/2021-2022
Aizawl, 23rd November, 2021 : Mizo zinga ziakmi insuihkhawm pawl “Mizo Writers’ Association (MWA)” buatsaihin vawiin khan Synod Conference Hall, Mission Veng-ah kumin chhunga Board leh University exam-a Mizo subject a tithate chawimawina “ProficiencyPrize” hlanna inkhawm buatsaih a ni a, Higher & Technical Education Minister Dr R. Lalthangliana chuan he hun hi hman puiin MWA te lehkhabu buatsaih “Ziak Mite Chanchin Bu 3-na” a tlangzarh nghal a ni.

He hunah hian khuallian Dr R. Lalthangliana chuan thusawina hun changin thangtharte zingah Mizo tawng hman dik lohna hriat tur a tam sawt ta hle a, hetiang a nih avang hian sawrkarin a ngai pawimawh a, School Education department leh SEDP Human Resources Development Board chuan hetiang lama kan mithiamte nen tang tlangin Mizo tawng tihmasawn tur leh tichangtlung tur “Mizo Language Board” din turin hma a la mek a, kum thar lama Assembly session hmasa bera put luh turin Mizo Language Board Bill, 2021 peihfel hman a tum a ni, a ti.

Dr. R. Lalthangliana chuan Mizo Writers’ Association chu Mizo Tawng humhalhtu pawimawh tak an ni tih sawiin, Mizo Tawng hman dan dik leh ziah dan dik min zirtirtu in ni a, thangtharte tana lehkhabu tha leh rohlu tak tak min hnutchhiahtu in nih avangin Mizote tan in pawimawh hle a ni a ti a.Tunlai khawvel Information technology sang tak tak karah hian ;ehkhabu ziah leh chhiar kawngah tan lak kan ngai hle a, hetih kawngah hian theihtawp chhuaha thangtharte rilru leh thinlunga lehkhabu ziah leh chhiar tuh hi kan tum an ngai takzet a ni, a ti.

Kum 2008 atanga hlan tan Mizo Proficiency Prize hi chi 4-ah then a ni a. chungte chu –

1. Ch.Pasena Proficiency Prize - HSLC Exam-ah Mizo Subject-a a hmu sang ber hnenah hlan thin a ni a, mi 19 in dawng tawhin, kum 2021 hian mi 4 - Malsawmdawngzeli, Tlangnuam, (Mt Carmel HSS), Christina Malsawmsangi, Pawlrang (St. Joseph’s HSS), Esther Lalrinhlupuii, Vairengte (St Joseph’s HSS) leh Lalremruatmawii, serchhip IOC Veng (Marian HS Serchhip) te hnenah hlan a ni.

2. Lalmama Proficiency Prize - HSSLC Exam-ah Mizo Subject-a hmu sang ber hnena hlan thin a ni a. Kumin 2020 thleng hian mi 16-in an dawng tawh. Kuminah Lalmama Proficiency Prize dawngtu chu Laldinpuii, Vairengte (St Joseph’s HSS) a ni.

3. R. Buchhawna Proficiency Prize - B.A Mizo Honours Subject-a a hmu sang ber hnena hlan thin a ni a, mi 13 in an dawng tawh a, Kumin a dawngtu chu F. Lalbiaknia, Hrangbana College, Cherhlun a ni.

4. J. Malsawma Proficiency Prize - M.A Mizo subject-a hmu sang ber hnena hlan thin a ni a, mi 14-in an dawng tawh a ni. Tun tuma J. Malsawma Proficiency Prize dawngtu hi Gladys Lalhruaitluangi Pachhunga University College, Aizawl Venglai a ni a, ani hian Ch. Pasena Prize pawh a lo dawng tawh nghe nghe a ni.

Lawmman hian chawimawina thuziak leh tangka fai cheng 5000 theuh a keng a ni.

Vawiina Minister-in a tlangzarh tak “Ziak Mite Chanchin Bu 3-na” ah hian zofate zinga thuziak mi sulhnu nei tha mi 32 chanchin tarlan a ni a. A bu hmasa ber hi kum 2002 khan chhuah niin Ziaktu lar mi hrang hrang 23 te chanchin dah a ni a. Bu hnihna chu kum 2008 khan tlangzarh leh niin mi 30 chanchin dah a ni.