No.3109/2021-2022
Dated Aizawl, the 23rd November, 2021: Vawin khan Mizoram State Sports Council buatsaih Open Gym, New Capital Complex (MINECO) chu Pu T.C. Pachhunga, Vice Chairman, Sports, Youth Affairs, ICT & Tourism Development Board chuan a hawng. He hunah hian Pu H. Lalengmawia, IAS, Commissioner & Secretary, Sports & Youth Services chu Chairman niin, Pu John Tanpuia, MCS, Secretary, Mizoram State Sports Council chuan Technical Report a pe a ni.

Vawiina hawn tak Open Gym hi 'Fit India' programme hnuaiah SEDP 2019-20 sum hmanga siam a ni a. He Open Gym-ah hian insawizawina hmanrua chi hrang hrang 21 a awm a, hengte hi Arihant Industrial Corporation Ltd. Mumbai leh Game Time Company, 150 Playcore Drive SE Fort Payne, Alabama, USA te tangkawpa siam a ni.

He hunah hian Pu. R Lalzirliana, Minister, Power & Electricity etc. pawh telin, Open Gym hawn theiha a lo awm ta chu lawmthu a sawi a, tangkai taka hman nise a duh thu a sawi a ni. Hawnna inkhawmah hian Sports Department official te bakah sawm bik mi engemaw zat an tel a ni.

Khuallian Pu T.C. Pachhunga chuan sawrkarin mipui vantlang hriselna ngai pawimawh a, a duh apiang tana man chawi lova hman theih insawizawina hmun tha tak siam peih a ni leh ta chu lawmawm a tih thu a sawi a; mipui vantlang, a bik takin thalai leh upa lamte pawhin hmang tangkai turin kalkhawmte a chah a ni. Khuallian chuan Football chauh ni lo, Sports discipline dang pawh uar a tul thu a sawi a. Sports Policy zulzuia zirna inah nasa zawka sports uar a nih tur thu a sawi bawk. Chief Minister leh Sports Minister hmalakna avangin sum tam tak sports atanga (GST leh Cess, etc.) lakluh a nih thu leh State Finance sum dinhmun siamthatna atan pawha tangkai tak a nih thu a sawi bawk.

Pu. Lalsangliana, MCS, Director, Sports & Youth Services chuan kalkawmte leh Sawrkar mi pawimawh te, Open Gym hlawhtlin nana tha leh zung sengtu zawng zawng te chungah lawm thu a sawi a. Open Gym hawn a nih veleh demonstration neih zui nghal a ni.