No.3108/2021-2022
Dated Aizawl, the 23rd November, 2021: Vawiin chawhma khan District Agriculture Office Conference Hall, Project vengah Dr.Lalrotluanga Sailo, Deputy Director, Animal Husbandry & Veterinary Department, Project Management Unit, FOCUS, Mizoram kaihhruaina hnuaiah Kolasib district chhung a hmalakna leh hmachhawp enhona, Mid Term Review neih a ni a. International Fund for Agriculture Development aiawhte, Nagaland, FOCUS atangte leh Mizoram, FOCUS team aiawhte telin District Agriculture Officer, District Officer (LRS & WC), District Horticulture Officer, District Veterinary Officer leh KVK, Kolasiba hotute an tel.

Pu Behabtu Frew, Co-leader, FOCUS Mission chuan kalkhawmte lawmna thu sawiin FOCUS thil tum tihhlawhtlin nan Line Department hrang hrangte thawhhona a pawimawh thu a sawi a. Mid Term Review chuan hmasawnna rah tha a thlen ngei theih nan inpawh tlang tak a harsatna awmte leh kuthnathawktute leh ran vulhtute tihhmasawnna hna chak zawk a kalpui a nih theih nana rawtna awmte sawi hona huna hman a nih ngei a duh thu a sawi bawk a ni.

IFAD team-te hian Kolasib district chhunga FOCUS kaltlanga hmalakna hrang hrang an tlawh a, Boar Semen Station, Pig Breeding Unit, Dragon Fruit huan kalpui dan te leh Biological Control Laboratory, Thingdawla hmalaknate a hmun ah an endik nghal a. Ni 24, November, 2021 hian Thingdawl, Bukpui, Thingthelh leh N.Chaltlanga FOCUS hnuaia hmalakna an endik chhunzawm dawn bawk a ni.

Pu A.Lalhmachhuana, DPM, Kolasib chuan FOCUS dinhmun tlangpui tarlanna hun hmangin Line Department aiawha lo kalte atangin ruahmanna kalpui tum dan ngaihthlak a ni a. Kolasib district chu kuhva chinna hmunpui a nih angin huan neitute hlawk zawk nan leh saa kan intodelh lehzual theih nan kel vulh nen kal kawp theih dan sawiho a ni. FOCUS hnuaiah hian March 2021 atanga October 2021 thleng khan vawk 627 kah rai tawh a ni a, hri danna hi ar 11,905-ah pek niin thlai chi sem, tui dah khawlna sak leh thlai enkawl leh ran vulh dan chungchangah inzirtirna kalpui thin a ni bawk a ni. Kolasib district chhung ah FOCUS hnuaia loneitu intelkhawm (Farmer's Interest Group) 618 an awm mek a ni.