No.3107/2021-2022
Dated Aizawl, the 23rd November, 2021: Vawiin khan Er. Lalrinawma, Deputy Speaker leh Tuikum bialtu MLA ni bawk chuan a bial chhung khua Sialhau, Covid19 hrilengin a tlakbuak chhoh ve mek a tlawh a. Sialhau Community Covid Care Centre te tlawhin VLTF hruaitute nena inkawm hona te an nei.

Er. Lalrinawma chuan, Covid 19 chuan ziaawm lam panin lang mahse mitinte kan fimkhur thiam zel a la pawimawh hle a. Hriin min chiahpiahna hi a rei tawh a, hun pangai angin hna thawh a kal tluang thei lo tih kan hre vek awm e. Amaherawh chu eng chen nge min la chamchilh zel dawn kan hriat siloh avangin kan nunphung tibuai lutuk lo zawnga khawsakpui thiam kan zir a ngai chho ta niin a lang, tiin Sialhau khawtlang hruaitute a chah a. Kan inkhuahkhirhna te pawh kan her rem thiam a tul chho zel a ni, a ti. Bialtu MLA hian Sialhau 4C chu a tlawh nghala, an mamawh tur bungruate leh pawisa fai Rs. 70000 MLA Fund atangin a pe a ni.

Er. Lalrinawma hian Sialhau Handloom Centre sak mek pawh a tlawh nghal a, Tuikum bial chhunga Puantah zirtu tam berna khua annih avangin Handloom Centre chu an la chhawr tangkai hle dawna a hriat thusawiin, Tuikum bial chhunga Puantah lama tui leh eizawn tumte tana hmalakna lian tham tak kalpui tura ruahmanna siam mek a nih thute a tarlang a. Eizawnna nghet tha tak neih theihna a ni tih hre chunga theihtawp chhuah zel turin khawtlang mipuite chu a chah a ni. Sialhau Handloom Centre hi Ministry of Tribal Affairs atanga sum hmuh hmanga sak mek niin tunah hian hna tam zawk thawh zawh tawh a ni.

Pu Lalduhsanga, Sialhau VCP chuan bialtu MLA in an khawtlang hmasawnna tura hma a lakpuina hrang hrangah te lawmthu a sawi a. Hripui vanga harsatna an tawh laia an mamawh hmanrua leh pawisa faite pea, amah ngeiin a tlawh chu an lawm hle tih a sawi a ni.