No.3106/2021-2022
Dated Aizawl the 23rd November, 2021: Vawiin khan Serchhip District Election Office buatsaihin Electoral Literacy Club (ELC) Meeting hmun 2 ah neih a ni a, chawhma dar 10:30 ah Brilliant Higher Secondary School, Serchhipah neih niin chawhnu dar 1:30 ah Govt. Higher Secondary School, Serchhip te tan BNRGSK Hall ah neih a ni.

Chawhma lama hun hman puitu Pu Lalmuansanga Ralte, MCS, Deputy District Election Officer chuan, zirlaite chu ram nghahfak in ni a, in lehkha zir chhung a rei tawh dawn lova, chuvang chuan theih tawp chhuaha bei turin ka ngen cheu a ni, a ti a. Ram hruaitu tur thlang thin ram kan nih avangin mipuiten kan thlan turte kan hriat chian a pawimawh thin a, an thu ken leh an party manifesto te, mipui kaihhruai an tum dante leh an thil tumte kan hriatsak a ngai a, chung thilte chu zirlai kan nih lai atang hian ngaihtuahna kan sen a ngai a ni. Chuvang chuan vawiinah pawh chutiang thil inhrilhriatna chu kan rawn buatsaih a ni, a ti. Khua leh tui dik tak kan nih angin Electoral Roll ah kan inthun ngei tur a ni a, inthlanna a lo awmin kan aiawha kum 5 chhung atana roreltu turte kan thlang dawn a ni tih hre chungin vote kan thlak ngei thin tur a ni. Mipuiten kan duhzawng ngei ram hruaitu kan thlan hian ram inrelbawlna thianghlim leh langtlang atan hna tha tak kan thawk tihna a ni, tiin Electoral Roll-a inthun ngei tur leh inthlannaa vote thlak ngei thin turin zirlaite a chah a ni.

Chawhnu hun hmanpuitu Pu Kumar Abhishek, IAS, District Election Officer pawhin, Vote thlak pawimawhna sawiin, ram hruaitu mha thlang tura vote thlak chu mitin mawhphurhna, democracy bulthut pawimawh a nih thu a sawi a, kum tling tharte chu Electoral Roll a inziaklut ngei tura chahin, vawiina zirlai naupangte chu hmalam hun lo awm tura Mizoram innghahna an la ni dawn tih hrereng turin a chah a ni. Mipuiten lang tlang taka kan aiawha roreltu kan thlang thin hi a hlu em em a, he kalphung hlu leh zahawm tak hi vote thlak thintu mipuiten kan ngaihhlut zel a pawimawh a ni a ti bawk.

Hun hmanna pahnihah hian Pi Lalrinchhani Ralte, MCS, Election Officer pawhin thu sawiin Democracy ramah chuan mipuiten kan aiawh kan thlang thin a, chumi tithei tur chuan Electoral Roll ah in ziah luh a ngai a, India khua leh tui, kum 18 tling chin chu mahni awmna part ah theuh BLO te kaltlangin kan inziak lut tur a ni. Election Commision of India chuan Electoral Roll-a awm thei te inziah luh hi a ngaipawimawh em em a, kuminah pawh ni 1 November, 2021 khan Draft Electoral Roll tarchhuah tawh niin, ni 1 January, 2022 a kum 18 tling tur chin, Roll-a la inziak lut lo kan awm chuan inziah luh vek tur a ni, a ti a. Vote an neih hunah pawh vote thlak lo ngaipawimawh hram turin kal khawmte a chah bawk a ni.

Attachment

  • Loading attachment...