No.3105/2021-2022
Dated Aizawl, the 23rd November, 2021: Vawiin khan Serchhip DC Meeting Hall ah District Level Coordination Committee on Fostering Climate Resilient Upland Farming System (FOCUS) te chu an chairman Pu Kumar Abhishek, IAS, Bawrhsap hovin an hnathawh mekte thlirletna (Mid Term Review) an nei a, Mid Term Review Monitoring Team ten an tel pui bawk.

Chairman Pu Kumar Abhishek chuan, meeting nei tura lokal International Fund for Agricultural Development (IFAD) Monitoring Team te, Nagaland PMU aiawhte leh Aizawl PMU aiawhte chungah lawmthu sawiin, Serchhip District a FOCUS hmalak dan tlangpui a tarlang a. FOCUS Serchhip District Management Unit hnuaiah khaw 43 ah hmalakna kalpui a nih thute, bial (circle) pathuma then an nih thute, khaw tinah Lead Farmer siam an nih thute leh Farmer Interest Group (FIG) 489 siam a nih tawh thu leh heng FIG ah te hian kuthnathawk member 8422 an awm thute a tarlang a. Line Department te nena thawh hona (convergence) an neih hrang hrangte pawh a tarlang bawk. Tin, Serchhip district a FOCUS kalpui a nih hnuah khaw pasariha chhungkaw 248 ten kumtin loneih bansana huan nghet neia eizawnna an kalpui tawh thu a tarlang bawk. Kumtin lovah bansana eizawnna nghet din hi FOCUS thiltum lian ber pakhat a ni.

Monitoring Team leader Pu Anton Glaeser pawhin thusawiin, Serchhip district hmalaknate chu fakawm a tih thu a sawi a. Line Department leh thawktu zawng zawngten FOCUS thiltumte a hlawhtlin theih nana hmalakna awmze nei dap reng turte, department dangte nena thawhdunna (Convergence) lama nasa zawka hmalak a tul ziate sawiin, an hmalak zelna turah duhsakna a hlan a ni.

Hemi hnu hian kum 2018 atanga Serchhip District chhunga FOCUS hmalakna hrang hrang, sum leh pai hman ral dan leh hnathawh tawh chinte uluk takin thlirletna an nei zui a, district chhung khaw hrang hrang atanga lokal Lead Farmer te leh Farmers Interest Group hruaitute nen FOCUS hmanga hnathawh tawh chinte uluk takin an sawiho a ni.

Meeting ah hian District Level Coordination Committee member te, IFAD Monitoring Team te, Project Management Unit, Mizoram leh Nagaland aiawhte, line department aiawhte leh khawtina Lead Farmer leh FIG aiawh hruaitute an tel a ni.