No.3104/2021-2022
Aizawl, the 23rd November 2021: Governor Hari Babu Kambhampati chuan vawiin khan Video Conference Hall, Raj Bhavan-ah MPWD leh Revenue hotulu te Kaladan Multi-Modal Transit Transport Project (KMMTTP) chungchang a sawipui.

He hunah hian MPWD lam atangin Powerpoint hmangin project hmasawnna leh thlenchin bakah harsatna thenkhat te an sawifiah a; Revenue Department lam atangin Land Acquisition chungchanga hmalakna kal mek te ngaihthlak a ni bawk a ni. KMMTTP hi Ministry of External Affairs(MEA), Government of India hmalakna a ni a; he project hi India in a thenawm ram te nena inlaichinna tha zawk a neih theih na tura a ruahman, project pawimawh tak a ni.

Governor Hari Babu Kambhampati chuan Mizoramin tunah hian project pawimawh tak pahnih KMMTTP leh Rel Kawng siam hna a nei mek a. Heng project pahnih te hi Mizoram leh hmarchhak tan mai ni lo India tana project pawimawh a ni a; a siam thuai hi Mizoram tan a pawimawh em em a ni a ti. Heng project thawh mekah hian central dawr a ngaih pawn theih tawp a chhuah dawn tih a sawi a. KMMTTP project peih fel a nih theih nan Mizoram chhunga MPWD te hnathawh zawh mai a tawk loa, Myanmar chhunga Ministry of External Affairs in hna a thawh te pawh peih fel tho a ngaih avangin MEA-ah pawh ngenna a siam tur thu a sawi bawk a ni. Governor chuan he project siam zawh a nih hunah Mizoram leh Kolkata inkar chu tuna kawng hman mek aiin a chanve lain a tawi dawn a. Hei hian bungraw phurh man a tih tlawm mai bakah Mizoram chu sumdawnna kawtchhuahah a siam dawn a ni a ti.

MPWD Engineer te report pek dan chuan KMMTTP ah hian sector 5 lai a awm . Lawngtlai - Zorinpui(87.51 Km), Zorinpui - Kaletwa(45 Km), Kaletwa – Paletwa(60.70 Km), Paletwa Lawngchawlhna – Sittwe Lawngchawlhna (150 Km) leh Sittwe Lawngchawlhna - Kolkata Lawngchawlhna (539 Km) te a ni a. KMMTTP route hian Kolkata leh Mizoram inkar kawngpui awm mek 1764 Km chu 882.21 Km ah a ti tawi dawrh dawn a ni. MPWD te hian Lawngtlai - Zorinpui(87.51 Km) kawngpui siam hna chu kum 2013 atanga khan an thawk tan a. Project hnathawhna sum hi a tirah Rs 579.65 Cr ruahman niin hei hi ennawn a nih hnuah Rs 1028.15 Cr ah a chho tawh a. Tunah hian 87.51 Km a thui kawngpui siam turah Km 84.19 Km siam zawh a ni tawha; Lei dawh hna hmun 8 ah thawh mek a ni bawk. MPWD te chhut dan chuan he project hnathawk mekah hian a siam hna 96.21% zawh a nih tawh a, project hnathawhna sum 95.68% hmuh tawh a ni bawk a ni. Tunah hian project ennawnna sum hmuhtur engemawzat hi hmuh a la ni lo a, ram lak tur chungchangah court case kallai a awm mek bawk a, hei vang hian contractor te an khawmuang deuh nia sawi a ni a. Heti chung hian MPWD te chuan heng harsatna tenau hi chinfel thuai a nih an beisei thu leh kum khat chhungin he project MPWD khawih chin chu zawh fel an beisei a ni. MPWD hotute chuan Aizawl leh Tripura inkalpawhna tur kawngpui pawimawh tak NH 44 A an siam mekah harsatna an tawh chungchang pawh Governor hrilhin in hmalak puiah an sawm nghal bawk a ni.

KMMTTP chungchanga Governor leh Official te inkawmnaah hian PWD lam atangin Pu JC Ramthanga, Addl CS to CM, PWD, etc., Er Henry Lalmuankima, E-in-C leh PWD, Er Lalruatkima, CE (Highways) bakah Pu R. Zarzosanga, Secretary, Land Revenue & Settlement Department te an tel a ni.