Vawiin hian Mizo Tawng Ziah Dan lehkhabu chhut hnihna, Mizoram Board of School Education hnuaia din Mizo Language Committee in a buahsaih chu khuallian Pu. Lalthangfala Sailo, Chairman, Mizo Academy of Letter chuan Mizoram Board of School Education Conference Hall-ah a tlangzarh. He lehkhabu hi kum 2008 a lo tihchhuah tawh Mizo Tawng Ziah Dan ennawnna leh tihlenna (revised and enlaged/ second edition) a ni.

Khuallian Pu Lalthangfala Sailo chuan Mizo tawngin hma a sawnna tur leh a ziah dana mipuite kan inlungrual zawk theih nana hetiang buatsaih a ni chu lawmawm a tih thu sawiin Mizote tan mel lung pawimawh tak nia a hriat thu a sawi a. Mithiam ten tawng hi a thang zel a ni an ti a mahse heng kan tawng thang zelte hi a zikpuiah ngei thang thei se a duhawm hle a ni a ti.

He inkhawm kaihruaitu Dr. Lalchungnunga, Chairman MBSE & Mizo Language Committee pawhin thu sawiin tun dinhmunah kimchang taka hetiang lehkhabu hi siam a la harsat avangin hei aia lian leh funkim zawk buatsaih tum a nih thu a sawi a, tuna an siam chinah leh la chhuah tharleh tur atan pawh sawi duh emaw rawtna nei duh emaw te tan an inhawng hle a ni tih a tarlang. Mizo Tawng Zian Dan lehkhabu a puitlin theihnana tha leh zung sengtu te zawng zawng chungah lawmthu a sawi bawk.

Pu. R. Vanramchhuanga, Director (Academic) & Coordinator, Mizo Language Committee in report a pe a, report a a lan danin chhut hmasa a ziahlan ve loh; thumal dang nena ziah zawm loh chi thumal 14 dah thar a ni a, thumal dang nena ziah zawm hun leh ziah zawm loh hun awm chi thumal 21 dah belh a ni bawk a, hei bakah hian chhut hmasaka thumal thenkhat ziah hran tura tih tuna ziah zawm tura tih leh tak 5 a awm bawk.

He lehkhabu chhut hnihna siam tur hian Mizo Language Committee hnuaiah Sub- Committee din a ni a, memberte chu;

Pu. R. Vanramchhuanga    Convener

Revd Chuahthuama           Member

Pu C. Chhuanvawra           Member

Prof. R.L. Thanmawia         Member

Pu H. Ronghaka                 Member

Pu. Darchuailova                Member te an ni.

Lehkhabu tlangzarh tak hi phek 99 a chhah niin Rs 30 a zawrhchhuah tura ruahman a ni.