Mizo Academy of Letters(MAL) buatsaihin vawiin khan I&PR auditorium-ah Mizo tawng zir hona seminar neih a ni a. Art & Culture Minister Pu R.Romawia chu Khuallian a ni.

Seminar hawnna inkhawm ah thu sawiin Pu Romawia chuan Mizo tawng dik humhalh a pawimawh rualin duh fir leh nawr chep lutuk emaw, phalrai lutuk erawh a hlauhawm thei tih a sawi a. English leh French ten an hnam leh an tawng humhalh tura hma an lak dan tarlangin English ten hnam dang tawng an seng luh belh zel atangin an tawng an ti hausa thiam a. French ho te erawh chuan khua leh tui nihna phal zau vin hnam hrang hrang te an hnam ah an seng lut thiam a. Mizo ten kan hnam leh kan tawng humhalh turin kan tum danah kan chian a pawimawh, a ti. Naupang ten zirna bul an tan nan English medium kan thlang uar ta chuan Mizo tawnga hma an sawnna tur a dal nia a hriat thu sawiin Pu Romawia chuan thalaite zingah English leh Mizo tawng pawh a eng a mah thiam bel lo ve ve an tam ta chu pawi a tih thu a sawi a. Mizo tawng a ral loh na tura fimkhur taka humhalh leh tih hausakna kawngah ke pen a pawimawh hle a ni, a ti.

Seminar hawnna inkhawm hi MAL President Pu Lalthangfala Sailo in a kaihruai a.Khuallian chuan Pu B.T.Nghinglova IPS(Retd) lehkhabu ziak 3, Fakna Hla Thlankhawm, Eden ah i kir ang u, Chanchin tha thuruk tih lehkhabu te a tlangzarh nghal a. MAL Secretary Dr.Rualkhuma Colney in inhmelhriat tirna thu a sawi a. Seminar ah hian YMA branch hrang hrang aiawh te MAL member te kal khawmin kum 1964 a MAL dintu zinga mi 2, Pu J.Malsawma, MAL Secretary hmasa ber leh Pu R.V.Lalmawia te pawh an tel a ni.

Seminar ah hian thupui thlan chhuah pali ngaihthlak a ni a. Pu Lalthangfala Sailo-in Mizo tawng lam dan dik leh tawng dangin a chim ral chungchang a sawi a. Pu C.Chhuanvawra’n Mizo tawng ziak dan : harsatna leh a chinfel dan tur tih a sawi a. Pu Darchuailova Renthlei-in Mizo tawng Grammar zia rang leh a zir dan tur tih sawiin Pu Rozama Chawngthu-in tunlai Mizo tawng hman dik loh lar zualte tih a sawi a.Heng thupui 4 te hi sawiho a ni.

Chawhnu hun hi Dr. Zoramdinthara, Asst. Proffesor. Pachhunga University College chuan a kaihruai a, he hunah hian Thupui pali - Mizo Inpumkhatnan Mizo tawng - Dr. Chawngkhuma Chawngthu, Mizo tawng Hmathlir - Prof. Laltluangliana Khiangte, Mizo tawng danglam bikna te - TC Zonunsanga leh Mizo tawng tihhmasawn nan leh vawn him nan Chanchinbu te - Enid H. Lalrammuani te present chu zirho a ni.