Art &Culture Department leh Mizoram Upa Pawl General Headquarters bultum “Mizo Tawng Zirhona” Seminar nileng awh chu vawiin khan Aizawl Vanapa Hall-ah neih a ni a. Art &Culture Minister Pu P.C. Zoram Sangliana’n khuallian chan changin Seminar hi a hawng a ni.

Seminar hawnna inkhawm Art  & Culture Director Pu Ngurbiaka kaihhruaiah hian khuallian chuan kum 2000 hnu lamah hian khawvela thiamna sang Information Technology lamah Mizo te pawh namen lovin a nghawng a, a bikin thalaite nunah nasa takin tawng tualleng leh dangdai, tawng kauchheh mak danglam leh awlsam zawk a hluar chak ta hle a. Hemi avang hian tuna kan mamawh pui ber “need of the hour” chu Mizo tawng dik zir leh hman hi a ni, a ti. Information Technology thangduang tak hi hnualsuat ngawt theih anih si loh avangin tawng dik zir hi Art & Culture Department hma bil mai nilovin University lama mithiam te hmabak ni pawhin a lang a ni, a ti a. Khawvel hnam chi hrang hrang tawngte hi sakhuana nen inzawmna thui tak nei an ni tiin Art & Culture Minister chuan Mizote ngei pawhin Kristian kan nih hma pawhin kan biak thin chu Pathian a ni, a ti a. Kristianna in kum 100 chuang min chenchilh hnu pawha mimal anga a ngaihmawh em em hlamzuih la awm fo chu sawichhuakin Pu P.C. Zoram Sangliana chuan tunlai khawvelah hlamzuih ti tawp tur hian mipui mimir hnenah ngenna a siam a ni.

Pu Lalzuia Colney in ‘Mizo tawng tobul leh hmasawn dan’ leh Pu Rozama Chawngthu in ‘Mizo tawng kalphung leh kan hman dik loh dan’ tih thupui hmanga an thuziak an chhiarchhuak a. Chawhnu lamah Seminar chhimtuten sawihona hun an hmang a ni. Vawiin Seminar-ah hian khawpui chhung MUP Unit hrang hrang atanga palai leh chanchinthar lakhawmtu engemawzat an tel a ni.