Nimin khan NLUP Nodal Minister Pu H.Liansailova hovin a office chamber-ah NLUP Marketing Cell an thu khawm a. NLUP hmalakna hnuaia kut hnathawktute thar chhuah hralhna tura ruahmanna hrang hrang te leh hma thar lakna tur pawimawh te an sawi ho.

Marketing Cell-in loneitute thar chhuah chhek khawmna tur Go-down leh thlai vawn thatna Cold Storage dinhmun thlithlai a Vairengte an tlawh report chu he meeting ah hian ngaihthlak a niin heta tanga hma lakna tur pawimawh te sawi ho a ni a. Vairengte bakah Champhai leh Serchhip a Cold Storage awm sa enkawl zui leh hman tangkai dan tur te pawh ngaihtuah nghal a ni bawk. Thlai thar chhuahte awmze nei taka market nen thlun zawm turin NLUP chu a tira crop zoning ruahmanna dung zuia kalpui chhunzawm a pawimawh zia pawh sawi ho a niin hemi chungchanga beneficiaries te fuih leh zirtir turin AMFU, Synod Social Front leh Hnam Chhantu Pawl te nena thawh ho dan tur pawh he meeting ah hian ngaihtuah a ni a. Loneitu ten an tha hah man hlawkna tam ber an tel theih nan regulated market siam chungchang ah Trade & Commerce hnenah rawtna thlen tha an ti a. Hmunphiah beneficiaries te hnena training pek chungchang leh Market Intervention Scheme te pawh sawi ho a ni bawk.

Marketing Cell nena meeting neih hma hian Pu Liansailova chuan Industries department hotute meeting a neihpui bawk a. Industries beneficiaries te hmalakna uluk zawka enzui turin Industries department kalphung siam that ngaite sawi ho a ni a. Hemi bakah hian Industries department hnuaia trade 10, UD&PA enkawl tura tih chu a taka UD&PA in a kalpui thuai theih nan sum leh beneficiaries inhlan fel dan tur pawh sawi ho a ni.