Vawiin khan Directorate of School Education Conference Hall-ah State Level Working Group for Shiksha ka Haq Abhiyan meeting chu an Chairman Pu Lalsawta, Education Minister hova neih a ni.
Chairman Pu Lalsawta, Education Minister chuan he meeting atana thu pawimawh leh hriattur tulte sawina hun a hmang hmasa a. Naupangten zirna tha an hmuh ngei theih nan nasa taka hmalak mek zel a nih thu te, zirna tha an hmuh zel theih nan he meeting ah hian member te chu an ngaihtuahna te hmang theuh turin a sawm a ni.
Shiksha ka Haq Abhiyan hi India khua leh tui naupang tupawh, kum 6-14 inkarte a thlawna zirna pekna tur Dan ‘Right to Education Act, 2009’ tihhlawhtlin a nih ngei theihna atana sorkar laipui Ministry of Human Resource Development (MHRD) in a bika programme a duan a ni a. Shiksha ka Haq Abhiyan hi India rama Education Minister hmas ber Maulana Abdul Kalam Azad-a piancham November ni 11, ‘National Education Day, 2011’ khan Nuh, Mewat, Haryana-ah launched a ni a. MHRD chuan Shiksha ka Haq Abhiyan hnuaiah sorkar leh tlawmngai pawl te State Level Working Group din theuh turin a ti a, chumi ang chuan Mizoram ah pawh din a ni ta a ni.
Shiksha ka Haq Abhiyan hnuaiah hian awmze nei taka RTE Awareness Campaign kalpui tur leh RTE in Elementary sikul nihphung tur a tarlante a taka kalpui a nih leh nih loh zirchianna ‘Identification of RTE Complaint School’ neih tura ruahman a ni.
State Working Group ah hian Education Minister chu Chairman a ni a, Secretary, School Education chu Vice Chairman niin State Project Director, SSA chu Member Secretary a ni. He meeting ah hhian member an tel tha hle.
