No.2733/2021-2022

Aizawl the 26th October, 2021 : Vawiin khan Thiamna platform, thiamna.com chu Dr Vanlaltanpuia, MLA, Chairman, Mizoram Youth Commission chuan a tlangzarh. 


Khuallian Dr Vanlaltanpuia chuan Mizo thalaite hi thiamthil (skills) nei tha leh hmangchang hre tak an ni a, Mizo thalaite ngeiin an thalaipuite tanpui thei tur platform tha leh tangkai an buatsaih chu lawmawm a tih thu a sawi. Mizoram Youth Commission chuan hetianga Mizo thalai chawikanna awmze neite a ngaihhlut thu a sawi bawk.

He tlangzarh inkhawmah hian Pi Elvina Lalmuanpuii Leivon, IA&AS, Deputy Accountant General (CAG, Govt. of Mizoram) chu Special Invitee niin thu a sawi ve a. Academic leh Skills lama mi hlawhtlingte chanchin luankhawmna platform thar - thiamna.com - chuan a tiphur hle a ni tih a sawi a. Mizo thalaiten zirna kawng an zawh zelnaa puitu platform tangkai a nih ngei a beisei thu a sawi bawk.

Pu LTL Fela, Co-Founder, Thiamna platform chuan sawizauna hun neiin, field hrang hranga Mizo hlawhtling tak takte chanchin, awmze nei zawka dahkhawm a, hengte hmanga khawvel ram hrang hranga Mizo thalaite fuih hi he platform-in a tum ber a nih thu a sawi. 

Vawiina tlangzarh inkhawm zawhah hian 'Mizo thiamna neite hian Mizoram tan enge kan tih theih?' tih thupui hmangin 'Open Discourse' hun hman nghal a ni.


Attachment

  • Loading attachment...