‘Ram leh hnam humhalh turin Mizo thalaite hian vawiina hnamdang / ram dang atanga kan thawh peihloh thawktute thawh mek hi kan thawh a hun ta a ni,’ Pu Hmingdailova Khiangte chuan a ti.

He thu hi vawiina Mizo film thar ‘ Amicus” tlangzarhin Pu Hmingdailova Khiangte, Parliamentary Secretary for Sports chuan I & PR Auditorium-ah  a sawi a. Film thar, Mizo tawnga  siam chhuah thar hian amahah ngaihtuahna thui tak a pek thu sawiin, Mipui vantlangin kan hriat lem si lohvin Mizo film hian hma alo sawn hle mai tih ka zir thar a ni, a ti a. Ram chhungah lehkha thiam hna neilo kan tam tawh hle laiin Private Company leh Industries te a thang ve silova. Hetih mek laia mahni talent hai chhuaka sum leh pai deh chhuahna leh midang pawh cho chhuak khawpa mi thenkhatin hma in la hi a ropui ka ti takzet a ni; Pu Khiangte chuan a ti a ni. Kan thawh peihloh thawktu Burma leh Tripura etc atangin hnamdang kan khawi teuh a. Workshop-a Mechanic tha chu hnamdang an ni tlangpui a, Skul-a Science leh Maths Teacher pawh chutiang thovin Mizo lo an tam em em a. Chutih laiin mizo hmeichhia ten hna an thawk nasa a, kan mizo mipate hnathawk peihlo pasala neih ai chuan hnamdang an nei mawlh mawlh tawh bawk a. Mizote hi kanin en chian ava hun ta em, a ti bawk a ni.

Pi Lallianpuii, Khualzahawm, Dy. Director, I& PR pawhin thu sawiin Mizo film siamtute hi tun dinhmunah chuan a tuia tui chilh tak takte, sum leh pai pawh nei em em lote hmalakna a ni tlangpui a. Film tha, chhungkua a enho tlak mahni tawng ngei hmanga siam a, thiamna sang zawk nena kan chhawpchhuah chhoh zel chuan tuna Vai film leh Korean film Zo twang lehlin, mizoten kan en duh ngawih ngawih tehi ala luahlan ngei a rin thu a sawi a. Cinema Hall tha takte pawh kan khawpuiah te ala ding leha a rin thu pawh a sawi a, Film siamtute chu nasa taka tan la turin a fuih a ni.

Film tlangzarh tak Amicus hi Jam Industry siam a niin vawiina tlangzarhna inkhawm hi Pu Lalmuanpuia Renthlei, Producer, JAM Industry-in a kaihruai a ni.