Vawiin chawhma khan Economics & Statistics Department chuan Statistics Day Aijal Club-ah an hmang a, he hun hi Economics & Statistics Department Minister Pu Lalsawtan a hmanpui a. Price Trends in Mizoram 2014 bu chhuah hmasak ber chu a tlangzarh nghal a ni.
Minister Pu Lalsawta chuan, Economics & Statistics Deparment-a thawktute chuan mipui, kohhran leh tlawmngai pawlte tan chhinchhiahna tur statistic dik leh rin tlak an vawn sak thu sawiin, thawktute pawh rin thu mai ni lo a dik leh rintlak taka statistics vawng zel tur an nih thu sawiin, Statistic chu mahni duh thu anga vuah mai chi a nih loh thu leh ‘a vel ‘ ah in nghat lovin a chiah chiah kan hre zel tur a ni’ a ti a. Department thenkhat chuan an hnathawhna ah statistic dik tawk lo hming that duh vang leh hlawk zawk thlir vang ten an lo nei a nih pawh in Economics & Statistics deparment erawh chuan a ti ve tur a ni lo tia sawiin, department-a thawktute chu a hma aia nasa zawkin Statistics Day an hman atang hian statistic dik neih nana tanla turin a fuih bawk a ni.
Mizoram-ah Data Statistics neih a pawimawh zia leh Birth & Death Certificate chungchangah te chhinchhiahna hrang hrangah Economics & Statistics hnathawh chu a pawimawhin dawt sawi awih a nih ve loh thu khuallian Pu Lalsawta chuan a sawi a. India ram mihring cheng zat leh thil pawimawh te chhinchhiahna data dik leh rin tlaka ngaih tur a nih ang bawkin Mizoram-ah hetiang a awm theih nan a Economics & Statistics department te hnathawh chu a pawimawhin ram tana chhawr nahawm tak siam tu an ni tiin a tha leh rin tlak a ni ngei em tih hre tu pawh an nih avangin rilru siam thara in hlan turin he department-a thawktute zawng zawng chu a ngen a ni.
Statistic Day ah hian hi India rama statistic in hmun pawimawh tak a luah theih nana hmalatu Prof. Prasanta Chandra Mahalanobis-a (1893-1972) chu sawi hmaih thiang lo a ni thu leh mimal taka statistic laboratory dintu a ni a; sorkar ngei pawh in statistic pawimawhna a la hriat vak loh laia bul lo tana hna lo thawk nasa tu a nih thu khuallian chuan sawiin, hmalatu Prof. Prasanta Chandra Mahalanobis-a chu statistic luh chilha a buaipui avang hian khawvel ram hrang hrang hriat leh ngaihsan hlawh a ni a, Economic & Statistics department chuan kan hre reng tur a ni a ti bawk.
Statistics Day Aijal Club-a hman hi Pu Vanlalrema, Director, Economics & Statistics Department chuan kaihhruaiin Dr. C Vanlalramsanga, Secretary Planning & Programme Implementation Department in sawi hawnna hmangin chawhnu lamah Pu Lalthlamuana Ralte, Asst. Professoner, Economics Department, Pachhunga University College in Social Development leh a kaihhnawih department hrang hrang chungchangah paper a present an zirho lehnghal a ni.
