Vawiin khan Lunglei District Cooperative Union Ltd chuan Sub-Hqrs YMA Conference Hall-ah an General Assembly vawi 20-na an hmang a; ARCS, Lunglei Pi Lilypari Sailo chuan Khuallian chan changin inkhawmpui hi a hmanpui.

20th LDCU Annual General Assembly hawnna inkhawm LDCU President Pu H.Lalnunmawia kaihhruaiah Pi Lilypari Sailo chuan Cooperative Union hi mirethei leh harsa zawkte tana intundinna kawng tha tak a ni a, chuvangin mahni telna Cooperative Society theuhah rinawm leh taima taka theihtawp chhuah turin kalkhawmte a chah. Society tam tak din a, kal ngaihna hre leh si loh ai chuan Society pawh tih tlem a, awmze nei zawka intelkhawmin ruahmanna felfai zawk siam chu a fuh zawk a rin thu sawiin Pi Lilypari chuan khawtlang leh mipuite tana chhenfakawm nih tum theuh turin Society member zawng zawngte duhsakna a hlan bawk a ni.

LDCU E.O. Pu C.Lalengmawia chuan Annual Report-a a tarlan danah kum 2014-2015 chhung khan LDCU hotute chuan District Level Society leh Lunglei District Milk Producers’ Coop. Society(LMPCU) te chu luhchilhin a takin Cooperative Training an neihpui a; Cooperative Education tum 4 lai buatsaih a ni bawk. Society hrang hrang-te training an neihpui tura an mamawh video projector, digital camera leh computer laptop te pawh lei thar a ni a. Ni 5th March 2015 atang khan Milk Plant (bawnghnute sawngbawlna hmun) chu AH&Vety Department kut atangin LMPCU Ltd kutah hlan a ni a; LMPCU member-te hian milk producers, thawktute bakah market/sales thlengin a taka luhchilhin beihpui an thlak mek zel a ni. LDCU-in magazine a chhuah thin ‘Hruaitu Eng’ pawh chhuah chhunzawm thar a ni bawk a. LDCU chuan National Cooperative Union of India (NCUI) zawm an dilna pawh pawmsak niin tunah hian ramchhung Cooperative Union dangte nen an inthlunzawm fel tawh a ni. HPC Vice-Chairman Pu S.Laldingliana hnenah office building an mamawh thu an thlen angin, LDCU Ltd Office building DPR pawh siam mek a ni a, HPC Vice-Chairman chungah pawh LDCU Ltd. chuan lawmthu an sawi a ni.

LDCU Ltd chuan hmachhawp a nei thenkhatte chu :

1. Lunglei khawpui chhunga sikul leh college hrang hranga Cooperative Education Training/Seminar neih

2. Lunglei District level Handloom & marketing Society din tura hmalak

3. Milk Plant hmasawn zelna atan a tul ang zela puibawm a, hmalakna kalpui zel

4. Society hrang hrang thingtlang leh khawpui chhunga Cooperative Education Training/Seminar an hmunhma ngeia neihpui.

Attachment

  • Loading attachment...