India hmarchhak State-a Health Minister te intawhkhawmna "Review Meeting on Progress under National Health Programmes" chu vawiin khan Assam Administrative Staff College, Guwahati-ah neih a ni a. He hunah hian Health Minister Pu Lal Thanzara pawhin thusawina hun hmangin, Mizoram mamawhte a thlen bawk a ni.

Union Minister Shri Jagat Prakash Naddaji kaihhruai Review Meeting ah hian hmarchhak state pasarih atangin Health Minister leh Official pawimawh thahnem tak an kalkhawm a. National Health Programme hrang hranga hmasawnna te thlir ho a ni.

He Meeting-ah hian Health Minister Pu Lal Thanzara chuan Mizoram a Health Programme hrang hrang kalpui a nih dan leh hmasawnna kan neihte report a pe a. Minister hian Mizoram, District 9 leh khaw 932 ah Village Health Sanitation and Nutrition Committee din a nih thu te, khum 150 awm theihna State Refferal Hospital pawh Sorkar Laipui scheme pakhat "Upgradation of Existing District Hospital" hmanga Medical Hospital atan Upgrade hna kalpui a nih mek thu te, Union Minister hnen atang pawha chhanna duhawm tak an beisei mek thu a sawi bawk.

Health Minister chuan Health Department thawktu dinhmun, Health Care Programme leh hmasawnna bakah Programme hrang hrang RCH, NVBDCP, NLEP, RNTCP, IDSP leh NCD dinhmun pawh chipchiar takin report a pe bawk a. National Urban Health Mission Programme hmangin Aizawl-ah Urban Primary Health Centre 6, Lunglei ah UPHC 2 thuam an nih tawh thu te a tarlan bakah "Health System Strengthening under NUHM" leh "Infrastructure Maintenance" sum hmanga Hospital leh Hmunhma dangte pawh thuam changtlun mek a nih thu a tarlang bawk.

Review Meeting-ah hian Minister Pu Lal Thanzara chuan Mizoram tana mamawh hrang hrang a thlen bawk a. Swine Flu case 4  Mizoramin a neih te a remchan dan anga tlachawp taka enkawlna siam sak an nih dan te sawiin hetiang a nih avang hian Swine Flu leh inkaichhawn theih hrileng enkawlna chu Mizoramah a rang lama neih thuai a tul thu a sawi a ni. Saiha District huamchhunga nau piang thihna tihtlem a nih theih nan Special Package mamawh a nih thu te, a bikin hemi kawngah hian mipuite an hriatna a la bil avanga an hriatna tuaihriam kawngah IEC material atan heng special package te hi hman ni se a duh thu a sawi a. National Health Mission atanga direct a State Health Society a sum lo lut thin, state finance kaltlanga alo luh tak avanga Fund Release kawnga harsatna leh programme hrang hrang tan pawh buaina a siam thu te a thlen bawk.

Health Minister hi Pu Lalhmingthanga, Health Secretary, Dr. K.Lalbiakzuala, Mission Director NHM leh Dr. Hmingthankimi ten an tawiawm a ni.