Vawiin khan Kelkang khaw chhung mipuite zinga Sorkarin a bika a tanpuina a sem tur hnuaia vawk vulh thei tura in report mi 216 hnenah vawkte sem a ni. Champhai DC Pu H. Lalengmawia'n tanpuina sem Kelkang Community Hall-a tanpuina semnaah Champhai Bawrhsap Pu H. Lalengmawia leh Champhai District AH&Vety Officer Dr. Lalchungnunga Pudaite bakah Vety Officer dangten an telpui a ni.

DC Pu H. Lalengmawia chuan Kelkang khaw mipuite dawhtheihna leh rinawmna chu faktlak a nih thu a sawi a. Harhna avanga mi a sang tel tlawhtu nitin dawngsawng thin an nih avanga an harsatna engemaw chen sutkian sak tura Sorkar Special Package duan chu tangkai taka an hman a duh thu a sawi a. Rangva leh tuizem sem pawh a dawngtu tur zawng zawng daih a sem theih a la nih loh avangin la dawng lo ten dawhthei taka an lo nghah a beisei thu DC chuan a sawi a. He a bika tanpuina sem tur hi tlak thuai turin sorkar lam chuan a theih tawp a chhuah thu leh, khawtlang hruaitute leh mipuite tawiawmna a pawimawh thu a sawi a ni.

Special Package atanga vawk vulh tur te hi chhungkaw khatah vawkte pahnih zel sem an ni a. Swacch Bharat hnuaia inthiarna unit 200 siam tur chu hna kalpui mek zel a ni bawk a. Champhai leh a chhehvel atang Kohhran hrang hrang ten work camp intirin ek in khur laih hna an thawk thin a ni.