Art & Culture Minister leh bialtu MLA ni bawk Pu R.Romawia chuan vawiin chawhnu khan Chawngthansiama (Naltea) Memorial Chaltlang Branch YMA building a hawng.

Hawnna thu sawiin Minister chuan Rajarammohan Roy Library Foundation (RRRLF) sum Rs 6 lakhs hmanga Library changtlung tak an siam thei chu lawmawm a tih thu a tarlang a, Library hmang tangkai turin kalkhawmte chu a sawm bawk. Mizo ten lehkhakanchhiar tam lo tiin Minister chuan lehkha chhiar tam chu hriatzauna a nih hriaa chhiar tam tura inzirtir uar deuh deuhturinkalkhawmte chu a sawm bawk a ni. Tunlai ram hlut zia ngaihtuahin a ram neitu Pi Lalthanchhungi te chhungkuain a thlawna Library atana ram an pe chu ropui tiin lawmthu a hrilh bawk.

Chaltlang Branch YMA Library building hawnna inkhawm hi Branch YMA President Pu Hnamhlunchhunga’n a kaihruai a, Vice President Pu Lalhruaitluanga’n Library sak chhoh dan report a pe a, a ram petu Pi Lalthanchhungi fanu Pi Laldawngliani leh midang ten thusawina hun an hmang bawk. Pi Laldawngliani leh Pu B.T.Nghinglova, IPS (Retd) ten an lehkhabu ziah te Library ah hian an hlan nghal bawk. Chawngthansiama (Naltea) Memorial Chaltlang Branch YMA Library hi ni 22.8.1986 ah din a ni a, Art & Culture Minister hmasa Pu P.C.Zoram Sangliana hma lakpuina azarah RRRLF, Kolkata atanga building grant sum Rs 6 lakhs an dawn atangin a building chu chhawng hnihin an sa zawm ta a ni. Mizorama recognised Library 467 awm mek zingah computerised hmasa ber a ni a, lehkhabu 5033 awmin member 379 an awm mek bawk a ni.

YMA Library building hawnna hi State Librarian Pi Laldingliani, Art & Culture Deputy Director Pu K.Lalruala leh mi dang ten an hmanpui a ni.