A bial chhung khaw hrang hrang tlawha thang mek Pu Lalrinmawia Ralte,Minister, Environment Forest & Climate Change, Labour & Employment, Co-Operation, Soil & Water Conservation, Industrial Training, Bialtu MLA ni bawk chuan Kuthnathawktute  ni Kawrthah khua-a a hmanpui zawh hnuiin Dt 20 January khan Sport & Youth Services  in an buatsaih Mizo Traditional Games, 2017  Zawlnuam Playground a neih chu kharna hun khuallian niin a hmanpui. 

Mizo Traditional Games kharna hun hmanpuitu Pu Lalrinmawia Ralte chuan Mizo infiamna chi hrang hranga inelna thianghlim nei tura kalkhawm infiam mite chungah lawmthu a sawi a,  Mizo pi leh pute atanga infiamna kan neihte chawinun a, chhawmnun chu thil pawimawh tak a nih thu a sawi, Ram changkang zawkte atanga  infiamna hrang hrang kan lakluhte hlamchhiah chuang lova hmasang atanga tawh a,  kan infiamna neih ve hrang hrang te kan ngaihhlut zual deuh deuh a tul thu sawiin kan hmasawnna leh changkanna avanga heng hi kan hlamchhiah a nih chuan hmasawnna khingbai a nih thu a sawi bawk. 

Bialtu MLA chuan infiamna hrang hrangah Hachhek tlangdung chu kan thang zel a, tunhnaiah Germany-a Football zir tura Kawrtethawveng tlangval pathum lai mai an kal thei chu lawmawm a tih thu leh thalai infiammite chu ruitheih thil laka fihlima mahni inthununna tha tak nena infiamna hrang hrang te chu  hmingthan nan, eizawnna nghelnget din nana hmang turin a chah a ni.  

Zawlnuam R.D Block huam chhung tana buatsaih Mizo Traditional Games 2017 kharna hun hi Pu Lalrinawma BDO, Zawlnuam chuan a kaihruaiin Dt 19-20 chhungin Mizo infiamna hrang hrang Mizo Inbuan, Insuknawr, Insaihruipawh, Kalchhet Intlansiak, Ketaminu Intlansiak, Kawi Inkahsiak, saikhawkher Inperhsiak, Arpa Insual hmang ten infiami mi 200 in elna neih a ni a, In elna hrang hrang hi kg anga then hran a ni bawk.  

Heng infiamna chi hrang hranga lawmman latute hi Khuallian hian a sem nghal a ni