‘Round Table Meeting on Promoting Technology in Education in Mizoram’ chu vawiin khan School Education Minister Pu H. Rohluna hovin Aijal Club ah neih a ni a. He meeting ah hian Minister chuan CLIx CD a tlangzarh nghal a ni.

Mizoram sawrkar chu mipui te hmasawn leh nunkawng siam thatna atana hmachhawp hrang hrang scheme leh project te tihlawhtling turin zau takin a inhawng reng tiin khuallian Pu H. Rohluna chuan sawiin TATA Trust te pawh Mizoram tan nasa taka hna an lo thawh tawhnaah lawmthu a sawi a. Tata Trust-te an rintawk avang leh Mizoram sawrkar Finance Department leh Law Department ten uluk taka an zir chian hnuah rintlak ngei nia an hmuh avangin CLIx project kalpui turin TISS nen thawhhona thuthlung (MoU)) an ziak ta tih a sawi a. Minister chuan Department of Education Directorate staff-te he project a an hmalakna fakin, zirlai te leh zirtir tu ten he project an hlawk pui chu lawmawm a tih thu leh he CLIx project hian Mizorama zirlai tam zawk, hmun kilkhawr tak taka awmte thlengin a huam vek a, hmasawnna a thlen zel a beisei thu leh kan State ngei an rawn thlan na ah lawmthu a sawi bawk.

Minister chuan Mizoram sawrkar in he CLIx project hi a ngaihlu a, a hlawhtlin ngei theih nan kawng hrang hrang hranga puih a inhuam tih he meeting-ah hian a sawi a. Tunah la hmin chiah lo mahse zirtirtu leh zirlai te atanga hlawhtlinna hmuh tur la awm leh hmasawnna pawh beiseiawm zel nia a lang chu lawmawm a tih thu a sawi a. Chutihlaiin Sorkar chuan he hmalakna hi lo thlir liam mai a tum lova, a theihna apiangah puih zel a inhuam thu a sawi bawk.

Pu P. Lalchhuanga, I.A.S Secretary, School Education kaihhruaiah hian Khual Zahawm Prof. Lianzela, Acting Vice Chancellor, Mizoram University pawh in thu a sawi a. Mizoram University hi CLIx project Mizoram ah Implementing Partner a nihna anga an hmalakna hrang hrang te a tarlang. Education Department hotu ten thusawi in Video documentary te thlirho a ni. Mizoram sawrkara officer leh TATA Trust, CLIx officials leh Tata Institute of Social Sciences (TISS) officials te he meeting ah hian an tel a sawihona te neiin hmalakna hrang hrang te ngaihthlak a ni bawk a. Cultural Programme neih hnu ah zanriah kil ho a ni.