Vawiin khan All Mizoram Farmers Union (AMFU) Lunglei District Headquarters Office leh Hrangchalkawna kuthnathawktute tana din Eastern Rural Institute and Research Centre te chu Rural Development Minister Pu R. Lalzirliana chuan Khuallian niin a hawng a. AMFU General Headquarters leh Eurovanille, India ten vanilla ching tura thawhhona thuthlung an ziak nghal a ni.

Pu R. Lalzirliana chuan kuthnathawktute tana Ni chhinchhiah tlak tak an hmang thei chu lawmawm a tih thu a sawi a. Sawrkarin kuthnathawktute theihtawpa tanpui a tum chung pawha hlawhtling kan awm theilo chu pawi a tih thu sawiin, mawhpuh tur bik zawng lovin kan zavaia kan inlehlin thawk a ngai a ni, a ti a. Tunlaiah kuthnathawktute khawl hmangin kan hahdam tawh tiin, lehkhathiam a that rualin, sawrkar hna zawn vek a hun tawhlo a, chutiang tur chuan mithiamte kaltlangin awlsam leh hahdam zawkin, kan ramah eizawnna tur a awm a ni, a ti. Lokal khawm te chu an hna thawh zelna turah rinawm leh taima taka hna thawk turin a fuih nghal a ni.

He hawnna inkhawm programme hi Pu Zion Lalremruata, General Secretary, AMFU General Hqrs. in a kaihruai a. Contract farming-a thawhhona hi kalpui a nih dawn avang leh market-a vanilla mamawhna a san avangin, tiral tur pawha harsatna a awm loh tur thu a sawi a ni. Vanilla ching tur hian Eurovanille chuan hmarchhak state hrang hrangah hma a la mek a, Mizoram chu a hmasa ber a nih thu a sawi bawk a ni. Eurovanille, India aiawha lokal leh Khualzahawm ni bawk Pi Mathilde Baudean, Agronomist, Project Manager leh AMFU General Headquarters te chuan thawhhona thuthlung kum 2030 thleng atan an ziak a ni.

AMFU General Headquarters President Pu Joseph H. Thanzuala chuan report a pe a. AMFU Lunglei District Headquarters Office chu cheng nuai 30-a leiin, mizopa chhiara chhawng 5 a ni a. General Branch, Technical Branch, Accounts Section, Conference Hall,  Sale Emporium leh Store Room te awm tura ruahman niin, hnathawktu mi 17 an awm mek a ni. Eastern Rural Institute and Research Centre-ah hian kuthnathawktute eizawnna hrang hranga hma la turte leh ram ei leh bar hmasawnna kawnga mamawh hrang hrangte zawn chhuah leh in zirtirna hmun tura ruahman a ni.