Ni hnih chhung awh Kolasib District mipuite tana Mizo Traditional Games hmanga inelna buatsaih chu vawiin khan Bialtu MLA Pu PC Zoram Sangliana’n, Regional Sports Training Centre, Saidan-ah a khar.

Kharna inkhawmah Pu PC Zoram Sangliana chuan, hnam ziarang leh nun chawikan a awm zel theih nana Mizo Traditional Games buatsaih a ni chu lawmawm a tih thu sawiin, hnam chindan humhalhna chang hrelo hnam an boral thin a ni a ti. Infiammi kalkhawm te Mizo nunze mawi leh infiamna kan neih te uar sauh sauh tur leh chhawm nung zel turin a chah a ni.

Mizo traditional Games hi sorkar laipui a Ministry of Tribal Affairs hmalakna Vanbandhu Kalyan Yojana (VKY) hnuaiah Mizoram Sports & Youth Services Department in district tinah a huaihawt a. Kolasib District bika neihah hian District chhung atangin mi 100 bawrvel an tel a ni.