Lunglei District-a Oil Palm Growers’ Meet 2016 chu vawiin khan Lunglei Convention Centre-ah hman a ni a. Horticulture Minister Pu PC Lalthanliana chu Khuallian niin, Agriculture Director (CH) Dr C. Lalzarliana chu Khualzahawm a ni.

Khuallian chuan sawrkarin kuthnathawk tute hi kan pawimawh in, sawrkar pawhin a ngai pawimawh a ti a. Tih tak takna nena hma la tute tan sawrkar a tlanchhe dawn lo a ni, a ti. Tunlaia thil kan tihna reng rengah lemchang nun a tam a ti a, sawrkar atanga hamthatna awm ni a kan hriat avang te in kan tui zawng kuthnathawktute zingah pawh thlak an tam ta hle a a hriat thu sawiin, mahni kan inti khawtlai mai a ni, a ti. Sawrkarah hlawhtlinna awm anga ngailo a, puitu pakhat ve mai a ngaiin, tum mumal tak neia rilru buatsaih a, tih tak takna nena hlawhtlin kan tum a ngai a ni, a ti.

Dr. C. Lalzarliana chuan India sawrkarin oil a kan intodelh theih nan ruahmanna tha tak scheme hrang hrang kaltlanga a siam thu a sawi a. Oil palm chu kum 25-30 chhung rah thei, a hralhna tura harsatna awm lo a nih avangin, loneitute tan pawh intodelh theihna leh dinchhuah pui tham a ni, a ti. Tha thawh lo a oil palm chin a, lawh leh tawp kan tum thin a, min enkawl let ve dawn a ni tih hria a theihtawpa kan enkawl a ngai a ni, a ti. Oil palm chu kumkhata vawikhat seng ang a ni lo a, thla tina seng a nih avangin, sawrkar hna thawk lo te tan pawh eizawnna nghet a ni thei a ni, a ti a. Sawrkara innghat reng lo in, mahni thawh rah ka ei dawn a ni tih rilru pua mahni ngei kan thawh a pawimawh em em a ni, a ti bawk.

He hawnna inkhawm hi Lunglei District Agriculture Officer Pu J. Rothanga’n kaihruaiin, Lunglei District-a Oil Palm dinhmun tlangpui te a tarlang a. Kum 1999-2000 atang khan Lungleiah oil palm chin tan niin, vawiin ni thleng hian hectare 6010.10-ah seedling 875169 sem tawh a nih thu a sawi. Lunglei District-a oil palm hlawhtlin lohna chhan langsar zualte leh hmabak thenkhatte a tarlang bawk a ni.

Oil Palm Growers’ Meet 2016 hi session hnih a then a ni a, thawhhnihna hi Agriculture Director (CH) Dr. C. Lalzarliana’n a kaihruai ve thung a ni. Mizoram tan a oil palm chin thatna te, Lunglei District chhunga oil palm farmer te harsatna leh oil palm mill din chungchang thusawi ngaihthlak a ni a. Sawihona hun hlawk thlak tak hman a ni bawk.