Vawiin khan MZP Hqtr Mamit ten Mamit District chhunga Mizo zirlai HSLC, HSSLC leh Bachelor degree exam, 2015 result nei tha te chawimawina an nei a, Pu John Rotluangliana, Minister FCS&CA etc.  chuan khuallian niin zirlai ti tha te chawimawina a hlan.

Khuallian Pu John Rotluangliana chuan zirlai tithate chawimawina thilpek an pek theih na tura MZP Mamit ten hma la a anmahni thawhchhuah ngei a chawimawina thilpek an buatsaih chu lawmawm a tih thu sawiin, entawntlak a tih thu a sawi. Zirlai chawimawi te an hma hun zelah chawimawi tlak a zir chho zela hlawhtlinna nei ngei tura zir zel turin a fuih a ni.

Vawiin hun hmannaah hian MZP President Lalhmachhuana chu khualzahawm niin zirlai te fuihna thu a sawi a. Pi R. Lalnunthari, District Education Officer, Mamit chu uaptu niin he hun hi a hmanpui bawk.

Zirlai te chawimawina hun a hmanpui bakah hian Pu John Rotluangliana chuan Rawpuichhip, Dapchhuah, Dampui, Mamit leh Lengpui a Village Council Member thar te kawmna hun a nei  a. Food Security Act chungchang hrilhfiahin,  Minister chuan Food Security Act hian chhungkaw nuai  sarih leh sangruk chiah a huam dawn a, BPL awm tawhlo in AAY chauh a awm tawh dawn thu sawiin, chung chuan thlatin Kg 35 an dawng thei dawn a. Mizoram population chanve vel hi min huam ve dawn lo a ni a ti a, a huam ve loh zawng zawng te pawhin ration dawn pangngai anga an dawn theih nan sorkar-in hma a lak mek thu a sawi. Khaw hrang hrang hruaitute chu an khaw chhungah Food Security hmang thei tur Selection Committee din tur leh party mi leh sa chauh thlang lova a mamawh tu diktak te thlang turin a ti.